وزیراعظم شہباز شریف عمرہ کرے، ملک انا شونداری ، شونہالی و سلامتی کن خصوصی دعاکرے

مکہ مکرمہ۔ 30 اپریل (اے پی پی) وزیراعظم شہباز شریف عمرہ کرے، ملک انا شونداری، شونہالی و سلامتی کن خصوصی دعا کننگا۔ ہفتہ نادے آ وزیراعظم مسہ دے ئی دورہ سعودی عرب اٹی مدینہ منورہ و جدہ ٹی پبی اِرا دے گدریفنگ آن پد عمرہ کننگ کن مکہ مکرمہ غا روانہ مس و ڈل اتون اوار عمرہ کرے۔ وزیراعظم مدینہ منورہ ٹی اڈکننگ نا وخت آ اِرا وار روضہ رسول صلی اللہ علیہ و آلہ وسلم آ حاضری تس ، ریاض الجنتہ اٹ نفل خوانا ، جمعتہ الوداع نا نماز ءِ مسجد نبوی ٹی خوانا، ملکی سلامتی، شونداری و راجی شونہالی کن دعا خواہس۔ جدہ ٹی وزیراعظم سعودی عرب نا ولی عہد شہزادہ محمد بن سلمان عبدالعزیز تون اہم اوڑدہی کرے، ہراٹی ہڑتوم آ ملک آتا نیام اٹ اقتصادی و واپاری رابطہ غاتے ودفنگ و زرکاری ءِ مون آ دننگ آن بیدس سعودی عرب اٹی پاکستانی افرادی قوت کن روزگار نا زیات آن زیات وارخواہی ودی کننگ نا بابت گپ وتران مس۔ بنجائی وزیر بلاول بھٹو زرداری، مفتاح اسماعیل، نوابزادہ شاہ زین بگٹی ، مریم اورنگزیب ، خواجہ محمد آصف، احسن اقبال، چوہدری سالک حسین، ڈاکٹر خالد مقبول صدیقی، محسن داوڑ و مولانا طاہر اشرفی ئسک ہم وزیراعظم تون اوار ءُ، منصب وزارت عظمیٰ ءِ سنبھالنگ آن پد وزیراعظم نا دا اولیکو درملکی دورہ ءِ۔