چیئرمین سینیٹ نا خواری کش آتا جہانی دے انا وخت آ کلہو

اسلام آباد۔ 30 اپریل (اے پی پی) چیئرمین سینیٹ محمد صادق سنجرانی پارینے کہ قومی شونداری نا عظیم جہد اٹی ننا جواں ہمت خواری کش آتا کڑد بھاز اہمیت تخک، پاکستان دا غٹ روشنا اصول آتا عمل کننگ ءِ ہرافتے ٹی مزور آتا حق انا فراوانی و رکھ ریاست نا آئین فراوان کیک۔ خواری کش آتا جہانی دے انا وخت آ تینا کلہو اٹی اوپارے کہ پاکستان تون اوار مچ آ دنیا ٹی یکم مئی خواری کش آتا حق انا رکھ انا علامت نا وڑاٹ اڈتننگک و پاکستان اٹی ہم خواری کش آتا حق انا فراوانی ءِ پک کننگک۔ چیئرمین سینیٹ پارے کہ کسبکار و بے کسبکار مزور آتا کم آن کم معاوضہ ٹی ودکی کرسا خواری کش آتا ویل آتے پین کم کننگ مریک۔ ڈپٹی چیئرمین سینیٹ مرزامحمد آفریدی خواری کش آتا جہانی دے انا وخت آ تینا کلہو اٹی پارے کہ یکم مئی اسہ اہم ءُ دے اسے و مزور آتے تینا مرغن و مشکل جہد نا اعزاز کن ہرسال یکم مئی ءِ ’یوم مزور‘‘ نا وڑاٹ اڈتننگک۔ ڈپٹی چیئرمین سینیٹ پارے کہ حکومت مزور آتا حق انا رکھ ءِ پک کننگ کن سنبرینگوک ءِ۔