کوئٹہ۔ 30اپریل (اے پی پی)پاکستان مسلم لیگ (ن) نا سینئر نائب صدر نواب سلمان خان خلجی پارینے کہ بدبختی اٹ انتس کہ روضہ رسول صلی اللہ علیہ و آلہ وسلم آ مس او ہرکلمہ خوانوک آڑکن ناقابل برداشت ءِ، عمران خان نا کماشی ٹی ہرا فتنہ ءِ مون آ دننگاکہ اینو او مقدس ہند آتے ہم پلویڑ کرینے ریاست مدینہ نا دعویٰ کروک آ پی ٹی آئی مدینہ ٹی سلوک مدینہ نا بے حرمتی ءِ کننگ ءِ عمران خان و اونا سنگت آک ہراوڑ مذہب ءِ سیاست کن کاریم اٹ ایسور داسہ اوفتا دروشم الس نا مون آ بے نقاب مسنے ، عمران نیازی ایلوفتے دُز پاننگ آن مست فارن فنڈنگ کیس و توشہ خانہ نا الس ءِ حساب ءِ ایتے۔ داڑے جاری مروک اسہ بیان اسے ٹی نواب سلمان خان خلجی پارے کہ مسجد نبوی صلی اللہ علیہ و آلہ وسلم ہمو جاگہ ءِ ہراڑے زور آن ہیت کننگ ہم منع ءِ ولے پی ٹی آئی تینا سیاسی دشمنی تے پورو کننگ کن حرم نا حرمت اسکان گیرام کرے نعرہ خلوک آتا پہچان تو مریک ولے پاکستان نا شناخت ءِ اینو ناقابل تلافی نسخان رسینگانے۔ اوپارے کہ مسجد نبوی صلی اللہ علیہ و آلہ وسلم اٹی پی ٹی آئی نا کارندہ غاتا نعرہ بازی نا اخس کہ مذمت ءِ کننگے کم ءِ۔ اوپارے کہ عمران خان نا ایجنڈا اقتدار، دروغ ، بے چیٹی ، پھسات تالان کننگ ءِ مسلم لیگ (ن) الس تون اواری اٹ داوڑنا سازش آتا پبی ورندی ءِ ایتک۔ اوپارے کہ عمران نیازی ایلو فتے دُز پاننگ آن مست فارن فنڈنگ کیس و توشہ خانہ نا حساب ءِ ایتے فارن فنڈنگ کیس اٹ پی ٹی آئی بھاز بے وڑ اختہ مسنے ہنداخاطرآن او داسہ ملک اٹ بے چیٹی تالان کننگ نا سازش کننگ ءِ ولے محب وطن پاکستانی پی ٹی آئی نا دا سازش آتا ڈٹ کر مقابلہ ءِ کیرہ۔
