اسلام آباد۔ 29 اپریل (اے پی پی) بنجائی وزیر بجلی خرم دستگیر خان پارینے کہ بجلی تنکی نا زموار مسکوہی حکومت ءِ ، ایندھن نا عدم دستیابی و تکنیکی خرابیک تنکی نا بنداوی سوب آک ءُ، مسکوہی حکومت ایندھن نا وخت آ بست وبند ءِ کریکہ تو ساڑی آ ویل آتون مون تروئی تمیتوکہ، ایندھن نا دوئی کننگ نا سوب 5739 میگاواٹ بجلی نا پیدواری لائخی آن فائدہ ہرفنگ پننگ ءِ۔ گردشی وام 2450 ارب روپئی اسکان سرمسنے۔ آر ایل این جی و فرنس آئل نا بست وبند ءِ کننگ اُن یکم مئی آن بجلی نا پیدوار اٹی پدریسہ ودکی بناکیک، لوڈشیڈنگ اٹی بروک آ دہ دے اٹی بھلو حد اسسکان کمتی بریک۔ ریاست مدینہ نا دعویدار آک مسجد نبوی نا تقدس ءِ پامال کریر۔ سعودی کمامدارآک وخت آ گام گیج کرینو، اومیت ءِ پین وخت اس داوڑ مفک۔ اوداخیال آتا درشانی ءِ جمعہ نادے آ داڑے وزیر مملکت بجلی ہاشم نوتیزئی تون اوار پریس کانفرنس آن تران کرسا کرے۔ خرم دستگیر خان پارے کہ داوخت آ مچ آ ملک اٹی بجلی نا تنکی ءِ و ہرانا سوب آن لوڈشیڈنگ مننگ ءِ، لوڈ شیڈنگ نا اولیکو سوب ایندھن نا دوئی مفننگ ءِ، ایندھن نا دوئی مفننگ نا سوب 5739میگاواٹ بجلی نا پیدواری لائخی آن نن فائدہ ہرفپننگ اُن، آرایل این جی، فرنس آئل و کولانا دوئی مفننگ نا سوب آن دا ویل ودی مسنے۔ گڑاس پاور پلانٹ آتے غلط و نابود مینجمنٹ نا سوب آن دادے تیٹی جوڑ جاڑ کن بند کننگانے۔ تکنیکی خرابی تا سوب آن 2156 میگاواٹ بجلی دوئی اف۔ بجلی دُزی نا توننگ کن گام گیج کننگ انگ ءِ و غٹ باندات آتا چاروکی کننگ انگ ءِ ، ڈسٹری بیوشن کمپنی تا ٹیم جوڑ کننگانے تانکہ عئید انا دے تیٹی تکنیکی خرابی نا سوب آن پین ویل ودی مف ہندا مسخت کن ڈسٹری بیوشن کمپنی تا عملہ نا عئید انا چھٹی تے ہم منسوخ کننگانے۔
