کوئٹہ۔ 29 اپریل (اے پی پی) پاک چین ہڑتوم آ کنڈآتا تعلقداری تے خراب کننگ نا ہر سازش ءِ بے سہب کننگک۔ داخیال آتا درشانی ءِ سینیٹر ثمینہ ممتاز زہری جامعہ کراچی ٹی چینی استاد آتا گاڈی آ خود کش جلہو اٹی زوال کروک آ چینی و ہندی بندغ آتا زوال کننگ آ است ہسونی و رنج و غم نا درشانی ءِ کرینے۔ اوتینا مذمتی بیان اٹی چینی قونصل جنرل و چینی شاری تتون ہڑزخواہی نا درشانی ءِ کرسا پارے کہ پاک چین سنگتی بے مٹ ءِ و داڑآ ہچ ءُ پین رائے اس اف، چینی شراری تا جان تا زیان آ بھاز ڈکھیائی مس ، دہشت گردی نا واقعہ بھاز قابل مذمت و افسوزناک ءِ۔ پاکستان و چین نا بے مٹ سنگتی و سی پیک نا سرسہبی دشمن تے کیدنگ مفننگ ءِ و داوڑنا منفی چم آتے اٹ پاک چین سنگتی ءِ نسخان تننگ نا سا زش آتے سرسہب مننگ کن ہلنگ پننگک۔ چینی استاد آتا جلہو اٹی زوال ننا اسیجائی غم ءِ و داٹی اوار زموار آتون پور و واکداری اٹ مون ایتنہ۔ دھماکہ ٹی زوال کروک آ چینی و ہندی باتی تا دتر زیان مفک۔ دہشت گرد آتے دانا قیمت ءِ تروئی مریک و ڈوہدار آتے اوفتے اوفتا کروک نا سزا تننگک۔ اوپارے کہ پاکستان اٹ دہشت گردی نا پد اٹ بھارت نادُو ءِ و او پاکستان مخالف پن انا تنظیم تے کاریم اٹ اتسا و ہندی مخلوق ءِ ہشکا ترسا تینا ناپاک مسخت آتا دوئی کننگ کن کاریم اٹ اتنگ ءِ ہرانا نن پبی مذمت ءِ کینہ۔
