اقوام متحدہ۔ 08 مارچ (اے پی پی) پاکستان اقوام متحدہ نا سلامتی کونسل اٹی ودکی آخبتی نشست آتا مخالفت ءِ پک کرسا پارینے کہ ہرا ملک آک 15 باسکی باڈی ٹی آخبتی نشست نا خواست کننگ ءُ اصل اٹ او طاقت و استحقاق دوئی کننگ کن کننگ ءُ نئے کہ او جہانی امن و سلامتی ءِ مون آدننگ نا است خواہی تخرہ۔ داخیال آتا درشانی ءِ او اقوام متحدہ ٹی پاکستان نا آخبتی مندوب منیر اکرم سلامتی کونسل اٹ اصلاحات کن جوڑ کروک آ فریم ورک یا ٹولی بین الحکومتی مذاکرات (آئی جی این ) نا دیوان آن تران اٹی کرے۔ اوپارے کہ امنائی سلاہ کن اتحاد (یو ایف سی ) آ مبنی ٹولی بھارت، برازیل، جرمنی و جاپان (گروپ آف 4) نا کنڈآن سلامتی کونسل نا ودکی آخبتی نشست آتا ودی کننگ نا خواست ءِ امنا کننگ کن تیار افس۔ یو ایف سی (ہرانا کماشی ءِ اٹلی و پاکستان کننگ ءُ) کونسل اٹ پین غیر آخبتی نشست آتیکن مہم چلیفنگ ءُ تانکہ اودے پین گچین و نمائندہ اس جوڑ کننگ مرے۔ سلامتی کونسل اٹ داوخت آ 5 آخبتی باسک ملک برطانیہ ، چین ، فرانس، روس و امریکہ و 10 غیر آخبتی باسک ملک آتیان تالان ءِ ہرافتیان غیر مستقل باسک ملک آک 2 سال اکن گچین مریرہ۔ منیر اکرم پارے کہ اگہ داوڑنا غیر رسمی سلابت نا کمک اٹ آئی جی این نا عمل اٹ پیش رفت کروئی ءِ تو داعمل اٹ اختراعات اف بلکن غٹ فریق آتا عہدہ غاتیٹی زیات لچک نا گرج ءِ۔ پاکستانی مندوب پارے کہ یو ایف سی غٹ آن زیات لچک نادرشانی ءِ کرینے و کونسل نا اصلاحات آ امنائی سلاہ ءِ مون آ دننگ نا کوشست آتیٹی تینا موقف اٹ اعتدال اتنگ نا پیش کش کرے۔
