اسلام آباد۔ 08 مارچ(اے پی پی) بنجائی وزیر ڈٹ بندی، شونداری، اصلاحات و خصوصی گام گیج اسد عمر پارینے کہ عمران خان نا ویژن راجی رکھ فراوان کننگ ئس، کورونا نا توننگ کن زالبول آک اہم ءُ کڑد اس ادا کریر، ملک انا نیمہ آبادی ءِ پدی تخسا نن شون ہلنگ کپنہ، پاکستان اٹی زالبول آتے تعلیم نا بابت خاص ویل مون تروک ءِ۔ سے شنبے نادے آ زالبول آتا جہانی دے انا بابت اڈ ہلوک دود آن تران کرسا اوپارے کہ شیریں مزاری کنے آن زیات خوانندہ ءِ او انگریزی ٹی ہیت کرینے، ای کم خوانندہ اُٹ ہنداخاطرآن ای اردو ٹی ہیت کیوہ۔ اوپارے کہ عمران خان نا ویژن راجی رکھ فراوان کننگ ئس، ثانیہ نشتر نا کمک اٹ راجی رکھ انا پروگرام نا بناءِ تننگا۔ نگار جوہر نا آرمی ٹی لیفٹیننٹ جنرل نا عہدہ اسکان سرمننگ اسہ اعزاز اسے۔ اسد عمر پارے کہ کورونا نا توننگ کن زالبول آک اہم ءُ کڑد اس ادا کریر۔ فرنٹ لائن ہیلتھ کیئر ورکرز آک کورونا ٹی کاریم کریر۔ پاکستان اٹی 76 درسد ہیلتھ کیئر ورکرءُ و 55 درسد ڈاکٹر آک زالبول ءُ۔ اوپارے کہ 88 درسد نرسنگ اسٹاف زالبول ءُ و مچ آ قوم انا کنڈآن اوفتا منت واری ءِ ہرفیوہ۔ ملک انا نیمہ آبادی ءِ پدی تخسا نن شون ہلنگ کپنہ۔ پاکستان اٹی زالبول آتے تعلیم نا بابت خصوصی ویل مون تروک ءِ۔ مستین اٹ اہم عہدہ سیاسی بنداو آ بشخنگاکہ وخت اس کہ عمران خان قابل آ بندغ آتے خلکونے۔ حکومت صنفی ایجنڈا ءِ مون آ دننگ کن گام گیج کرینے۔ دود آن تران کرسا بنجائی وزیر انسانی حق شیریں مزاری پارے کہ ساڑی حکومت زالبول آتے مون تروک ویل آتا ایسری کن گام گیج کرینے۔ زالبول و مسن تے سازگار ورکنگ چاگڑد اس فراوان کننگ کن گام گیج کننگ انگ ءِ۔ اوپارے کہ زالبول آتے کن سازگار ورکنگ چاگڑد اس فراوان کننگ نا دا سال انا وڑاٹ جتا کرینن۔ وزارت انسانی حق بیرہ حق انا بابت ہیت کننگ ءِ۔ حکومت نا دا زمواری ءِ کہ او تینا شاری تا حق انا رکھ ءِ کے۔ زالبول و چناتا حق و رکھ اکن کانود سازی کننگانے۔ ملکی تاریخ اٹ اولیکو زالبول لیفٹیننٹ جنرل نگار جوہر دود آن تران کرسا پارے کہ اسلام 14 سد سال مست زالبول آتے حق تسنے۔ زالبول آتا حق انا بابت پاکستان نا 156 ملک آتیان 153 می نمبر ءِ۔ پاکستان اٹ زالبول آتا بابت فیصلہ غاتے نرینہ کیک۔ اوپارے کہ زالبول آتے کن لیڈر شپ نا وارخواہی اف۔ زالبول آتے لیڈرشپ نا وارخواہی تننگے تانکہ او تینا فیصلہ ءِ تینٹ کننگ کیر۔
