اسلام آباد۔ 08 مارچ (اے پی پی) چیئرمین سینیٹ محمد صادق سنجرانی پارینے کہ پاکستان نا شونداری و شونہالی ٹی زالبول آتا خذمت آتے خراج تحسین پیش کینہ، اسہ قوم اس ہم زالبول آتیان بیدس شونداری نا کنڈآ ہِننگ کپک، و شون ہلوک ملک آتا شونداری نا راز ہم ہندادے کہ زالبول آک نرینہ غاتا ہم کوپہ خذمت سرتننگ ءُ۔ داہیت ءِ او زالبول آتا جہانی دے انا وخت آ تینا کلہو اٹی چیئرمین سینیٹ پارے کہ پاکستان نا شونداری و شونہالی ٹی زالبول آتا خذمت آتے خراج تحسین پیش کینہ۔ زالبول آک پک کرینو کہ ملکی شونداری ٹی او نرینہ غاتیان اسہ بشخ اسے ٹی ہم کم افس۔ زالبول آک زند انا ہر بشخ اٹی زالبول آک تینے منفینو۔ اوپارے کہ پاکستانی زالبول آک پاکستان نا پن ءِ اقوام عالم اٹ گچین وڑاٹ تالان کرینو۔ ننے زالبول آتے زند انا بشخ اٹی ہندن ءُ چاگڑد اس تننگ نا گرج ءِ ہرانا سوب آن اوفتے مون آ بننگ اٹ ہچ وڑنا اڑاند اسے تون مون تروئی تمپ۔ دین اسلام زالبول آتے ہمو عزت و شرف ءِ تسنے ہرانا او حقدار ئسر۔ چیئرمین سینیٹ پارے کہ اسہ نیاڑی لمہ، مسڑ، ایڑھ ، زائیفہ ہرروپ اٹی اہم ءُ ہند اس تخک و نن گمر کینہ کہ ہر پڑاٹ گوازی آن ہلیس سیاست، تعلیم، کانود سازی و دفاع تون اوار ہر بشخ اٹی زالبول نرینہ غاتا ہم کوپہ بلکن اوفتیان اسہ گام اس مون آ نظر بریرہ ۔ پاکستان اٹ زالبول آتے زند انا ہربشخ اٹ مون آ بننگ کن گچین گام گیج کننگانے۔
