اسلام آباد۔ 08 مارچ (اے پی پی) وزیراعظم عمران خان پارینے کہ داڑیل آتا گلدستہ و دُز آتا ٹولہ انت اس کہ کننگ خواہک کے ای تیار اُٹ، کیپٹن ہراتم گوازی کیک تو مخالف ءِ مون آ تخسا او ہرگڑانا ڈٹ بندی ءِ کیک، 25 سال آن راج انا نزور تپہ غاتا حق و انصاف کن جہاد کننگ اٹی اُٹ، اللہ تعالیٰ کنے داٹی سرسہب کے، ہراتم اسکان زندہ اُٹ بلیک میل کروک آتے این آر او تفرہ، ننا حکومت زالبول آتے وونٹ اکن آخا بلکن خلوص نیت اٹ عملی گام گیج آتا کمک اٹ واکدار کننگ کن جہد کرے، زالبول آتے میرات نا حق تننگ کن کانودی سازی کرینن ہراڑآ عملدرآمد کرفنگ مچ آ راج انا زمواری ءِ، احساس پروگرام نا رداٹ داتم اسکان 500 ارب روپئی بشخانن ہرافتیان 98 درسد زر زالبول آتا کمک اٹ تننگانے۔ داخیال آتا درشانی ءِ او سے شنبے نادے آ فاطمہ جناح یونیورسٹی ٹی جہانی یوم نسواں نا رداٹ اڈ ہلوک آ دود آن تران کرسا کرے۔ وزیراعظم پارے کہ ہراتم دا ملک انا تاریخ ءِ نوشتہ کننگک تو دا لکھنگک کہ ہرا حکومت زالبول آتے وونٹ اکن آخا بلکن است اٹ واکدار کننگ کن جہد کرے او ننا حکومت ءِ، اللہ تعالیٰ انسان ءِ دنیا ٹی ڈغار آ انصاف اس قائم کننگ کن گدریفینے و اودے عبادت نا رتبہ تسنے، ننا نبی کریم خواجہ صلی اللہ علیہ و آلہ وسلم زالبول آتے 1500 سال مست میرات نا حق تس وخت اس کہ یورپ اٹی 1920 اٹی زالبول آتے حق انا ملنگ بناکرے اوکان پد ہم پاکستان اٹی زالبول آتے تینا حق آن محروم تخنگک، پسماندہ علاقہ غاتے ٹی اوفتے جائیداد اٹی بشخ تننگ نا تصور ہی اف، دا روایت ہندوستان آن بسنے ہراڑے نیاڑی تے اوفتا اَرے نا کہینگ نا دروشم اٹ اوڑتون اوار ستی کننگاکہ۔ وزیراعظم پارے کہ حکومت زالبول آتا میراتی حق انا رکھ اکن کانود اس جوڑ کرینے داسہ اودے نافذ کننگ مچ آ راج انا زمواری ءِ، بیوروکریسی نا ہم داٹی اہم ءُ کڑد اسے، استاد آتے ہم دا بابت شعور تالان کروئی مریک۔ اوپارے کہ حکومت طلاق نا حالیت اٹ زالبول آتا حق انا رکھ ءِ پک کننگ کن ہم گام گیج کیک، زالبول آتا تعلیم آ خاص چکار کروئی مریک۔ وزیراعظم پارے کہ اونا سرسہبی ٹی اونا لمہ نا اہم ءُ کڑد اسے ہرا تعلیم یافتہ مننگ نا سوب آن اونا تعلیم آ چکار کرے۔ اوپارے کہ احساس پروگرام نا رداٹ حکومت 500 ارب روپئی بشخانے ہراٹی 98 درسد زالبول آتا کمک اٹ بشخنگا۔ وزیراعظم پارے کہ حکومت ہراوظیفہ غاتے تننگ ءِ اوفتے ٹی مسن تا زیات بشخ تخانے ، مار تے 40 درسد و مسن تے 60 درسد تننگ انگ ءِ انتئے کہ اگہ اسہ چناس خوانک تو مچ آ خاہوت خوانندہ مریک۔ وزیراعظم پارے کہ زالبول آتے تعلیم تننگ آن بیدس راج شون ہلنگ کپک۔ اوپارے کہ نبی کریم صلی اللہ علیہ و آلہ وسلم ہرا ریاست مدینہ ءِ جوڑ کرے اونا بنداو کانود نا حکمرانی آ ئسک، پاکستان اسٹ انگا ملک ءِ ہرا اسلام نا پن آ جوڑ مس۔ علامہ اقبال نا تغ ئسک کہ پاکستان دنیا کن اسہ درور اس جوڑ مرے۔ اونا پاننگ ئس کہ ریاست مدینہ ٹی واکدارءِ کانود نا ماتحت اتنگا، ہرا راج آتیٹی واکدار ءِ اِلنگک و نزور دُزی کے تو اودے زندان اٹ بِٹنگک ہمو راج شونداری و شونہالی نا کنڈآ ہِننگ کپک، نن کانود نا حکمرانی کن جہاد کننگ اُن، واکدار کانود نا شیف بننگ خواپک و بلیک میل کیک اگہ کنے این آر او تتوس تو ای حکومت ءِ بٹیوہ، ای ہراتم اسکان زندہ اُٹ اوفتا برخلاف جہاد کیوہ و این آر او تفرہ۔ وزیراعظم پارے کہ واکدار دُزی کرسا لندن اٹ ماڑی ہلیک و بے پرواہ چرینگک ولے چنکا دُز تے زندان اٹ بٹنگک ، ہرا راج کرپشن ءِ خراب تکپک او زوال نا گواچی مریک و مخلوق خواری کننگ ءِ اِلک، انتئے کہ اگہ دُزی کرسا پیسہ کٹیا کننگ مریک تو خواری کننگ نا انت گرج ءِ۔ وزیراعظم پارے کہ چین 4 ءُ نیم سد وزیر آتے کرپشن آ زندان تیا درے ہنداخاطرآن او شون ہلک، نن تینا حق اکن جنگ کینہ، 25 سال آن ای نزور تپہ نا حق و انصاف کن جہاد کننگ اٹی اُٹ، اللہ کنے اوٹی سرسہب کے۔ دود آن بنجائی وزیر داخلہ شیخ رشید احمد و بنجائی وزیر کانود و انصاف بیرسٹر فروغ نسیم و پارلیمانی سیکرٹری کانود و انصاف ملیکہ بخاری ئسک ہم تران کریر۔
