اسلام آباد۔ 15 فروری (اے پی پی) وزیراعظم نانمائندہ خصوصی بین المذاہب ہم آہنگی و دے ٹک نیامی امور و پاکستان علماء کونسل نا چیئرمین حافظ محمد طاہر محمود اشرفی پارینے کہ خانیوال واقعہ ٹی زہمی بندغ نا درستی راستی مسنے، حکومت زہمی بندغ نا خاہوت تون رابطہ ٹی ءِ، دوبہ دارآتے اوفتا کروک نا سزا تننگک۔ انتہاپسندی و دہشت گردی نا توننگ کن قوم اواری اٹ بایدے تفے۔ سے شنبے نادے آ داڑے پریس کانفرنس آن تران کرسا حافظ محمد طاہر محمود اشرفی پارینے کہ خانیوال واقعہ نا حالیت آتا بابت لاہور اٹی اینو(سے شنبے نادے آ) دیوان اس مریک، واقعہ نا حوال ملک پولیس دمدستی وڑاٹ موقع غا سرمریک، پولیس نا کچ کم ئس و مچی کچ اٹ زیات ئسک، سری لنکن شاری نا خون آنبار داواقعہ ءِ ہم ہُننگ انگ ءِ، اہم ڈوہدار تے دزگیر کننگانے۔ اوپارے کہ خانیوال واقعہ نا دوبہ دار آتے اینو ملتان اٹی انسداد دہشت گردی عدالت اٹ پیش کننگک۔ اوپارے کہ زہمی بندغ نا درستی راستی مسنے، حکومت زہمی بندغ نا خاہوت تون رابطہ ٹی ءِ، داواقعہ ٹی اوار 112 دوبہ دارآتے دزگیر کننگانے، داوڑنا باندات آتے ٹی ڈیوالئی نا ہچ ءُ گنجائشت اس اف، ریاست پاکستان دہشت گردی و انتہاپسندی نا خلاف بش مسنے۔ اوپارے کہ انتہاپسندی و دہشت گردی تدوک آ 30 آن 40 سال آن چلینگسا بننگ ءِ۔ اوپارے کہ خانیوال اٹی عدالت آن ایڑتر خون نا غٹ مکتبہ فکر انا عالم دین و مشائخ آک مذمت ءِ کرینو۔ اوپارے کہ کس اس داتکپ کہ داوڑنا واقعہ غاتیان پد ریاست چپ مریک، آئی جی پنجاب تفتیشی عمل نا تینٹ چاروکی ءِ کننگ ءِ، پاکستان اٹ توہین رسالت نا کانود ساڑی ءِ، ہراتم کس اس کانود ءِ دوٹی ہلیک اواو ہمو کانود نا توہین ءِ کیک۔ اوپارے کہ خونی تیان گیشتر ءِ نماز اسکان بفک،پک کینہ کہ امن کمیٹی جوڑ کرسا داوڑنا واقعہ غاتے توننگے۔ اوپارے کہ انتہا پسندی و دہشت گردی نا توننگ کن قوم اواری اٹ حکومت تون بایدے تفے، قومی ایکشن پلان و کلہو پاکستان بھاز کاریمی دستاویزءُ، اوفتیا عملدرآمد نا گرج ءِ۔ اوپارے کہ وزیراعلیٰ پنجاب عثمان بزدار تینٹ دا واقعہ ءِ ہُننگ ءِ و معلومداری دوئی کننگک ءِ۔ اسہ سوج اسے نا ورندی ٹی اوپارے کہ حکومت نا کنڈآن معاوضہ نا بابت المی گام گیج کننگک۔
