کوئٹہ۔ 18مئی (اے پی پی) وزیراعلیٰ نا سلاہکار معدنیات و کانڑ کنی حاجی محمد خان لہڑی پارینے کہ اینخو نا سال نصیر آباد سبی ڈویژن ئِ اوچ پاور پلانٹ آن بجلی نا فراوانی شروع کننگک اوکان گڈ سندھ آن سریس برقی ٹرانسمیشن لین انا دے پہ دے خرابی نا مشکلات و برقی وولٹیج اٹی کمتی و بیشی و ٹرپنگ نا ویل آخبتی بنداو تیا ایسر مریک۔ داخیال آتا درشانی ئِ او تینا دفتر اٹی نصیر آباد نا جتا ڈل آتون ہیت و گپ کرسا کرے۔ وزیراعلیٰ بلوچستان نا سلاہکار پارے کہ ملکی معیشت نا شون نا دارومدار صنعتی شون و شرح نمو ٹی گچینی آٹی ئِ ہنداسوب ئِ کہ ساڑی حکومت برقی شون انا ڈٹ آتیا اولین اولیت تس و وسیع المدتی و گونڈ وختی ڈٹ آتا پوروی آ 2018ءٹی مچ آ ملک آن برقی لوڈشیڈنگ نا ویل آخبتی بنداو تیا ایسر مریک ، اوپارے کہ وزیراعلیٰ بلوچستان نواب ثناءاللہ خان زہری نا سروکی ٹی بلوچستان شون و شونہالی نا کسر آ روان ئِ و صوبہ نا دیرینہ ویل آتے اولیتی بنداو تیا ایسر کننگ انگئِ ، اوچ پاور پلانٹ آن خڑک انا ضلع غاتے بجلی نا فراوانی و ڈیرہ مراد جمالی نا شاری تے مالکانہ حق انا فراوانی کن وزیراعلیٰ بلوچستان نا ذاتی است خواہی آن دا ویل آتا ایسری کن ترند رفتار پیش رفت مسنے و اینخو نا سال دا ہڑتوم آ السی خواست آتیا عملدرآمد مریک۔
