اسلام آباد۔ 18مئی (اے پی پی) وزیراعظم محمد نواز شریف پارینے کہ 2018ءنا گچین کاری تیٹی او الس نا عدالت اٹی اسہ روشن و گچین پاکستان اسے تون پیش مریک و شون نا دژمن واک آتے شکست ایتنہ۔ او داہیت ئِ چارشنبے آ وزیراعظم ہاﺅس اٹی مسلم لیگ (ن) نا قومی اسمبلی نا باسک عبداللہ شادی خیل (این اے 71) ، مس شازیہ مبشر (این اے 129) ، میاں عبدالمنان (این اے 83) تون ہیت و گپ کرسا پارے ہراک اوڑتون جتا جتا اوڑدہی کریر۔ وزیراعظم پارے کہ پاکستان مسلم لیگ (ن) نا حکومت شرحالی کن دے و نن کاریم کننگ ئِ ، الس ئِ زند انا بنداوی آسراتی تا فراوانی کن اولیتی بنداو تیا وسیلہ فراوان کننگ انگ ئِ، الس نا زند آتیٹی آسانی اتنگ کن مچ آ پاکستان اٹی پروگرام تیا ترند رفتاری اٹ عملدرآمد جاری ئِ۔ وزیراعظم پارے کہ انشاءاللہ ملک اٹی امن و ایمنی نا بحالی ، توانائی نا تنکی نا چٹفنگ، پاک چین اقتصادی راہداری و انفراسٹرکچر نا ڈٹ آتے ہندارفتار آن جاری تخنگک۔ اوڑدہی ٹی پارلیمان نا باسک آک تینا تینا حلقہ غاتیٹی جاری شونداری کاریم و السی ویل آتیان وزیراعظم ئِ معلومدار کریر۔ او وزیراعظم ئِ پاریر کہ الس حکومت نا شونداری ایجنڈہ و وزیراعظم نا معاشی وژن نا تائید ئِ کیرہ و اونا سروکی و پالیسی تیا پبی پت انا درشانی ئِ کیرہ۔
