واشگنٹن۔ 18مئی (اے پی پی) امریکہ اوغان حکومت و حزب اسلامی نا سروک انجینئر گلبدین حکمت یار انا نیام اٹ مذاکرات نا خیرمقدم ئِ کرسا پارینے کہ ملک آن بیدادی نا چٹفنگ کن دننگا سیاسی مذاکرات اٹی غٹ تعلقدار رڑآتے بایدے اوار مریر۔ امریکی محکمہ خارجہ نا ترجمان جان کیری پریس بریفنگ نا وخت پارے کہ امریکہ اوغانستان اٹی ہندی سروک اٹی مفاہمت کن ہیت و گپ نا مخ تفی ئِ کیک۔ جان کیری پارے کہ امریکہ اوغانستان اٹی مفاہمت کن مروک آ ہیت و گپ نا سرجم آتیا نظر تخانو ہرافتے ٹی غٹ آن المی دادے کہ مفاہمت نا عمل اٹی شریک مروک آ گروہ تشدد ئِ ہلنگ نا عہد کیر۔ بین الاقوامی دہشت گرد تنظیم آتیان تعلق ئِ چٹفیر و ملکی آئین ئِ امنا کیر۔ امریکہ دابابت ہچ ئُ شرط اس پیش کپک۔ اسہ سوج اسینا ورندی ٹی ترجمان پارے کہ اودے دا سما اف کہ امریکی کمامدارآک داہیت و گپ اٹی شریک ئُ یا آخا ولے او دا عمل آ نظر تخرہ۔ امریکی کمامدارآتا موقف ئِ کہ اوغانستان اٹی مفاہمت نا عمل اوغان تا سروکی ٹی مرے۔ اسہ پین سوج اسینا ورندی ٹی ترجمان مسکوہی امریکی سفیر ریان سی کروکر نا دا بیان نامخ تفی ئِ کرے ہراٹی او اوغان باتی تیکن امریکی ویزہ غاتا کچ ئِ محدود کننگ نا مخالفت کریسس۔
