اقوام متحدہ۔ 08 دسمبر (اے پی پی) پاکستان اقوام متحدہ نا جنرل اسمبلی ءِ معلومدار کرینے کہ جیو سٹریٹجک مسابقت و بحر ہند نا گڑاس ریاست آتا کنڈآن فوجی تسلط نا دوئی کننگ نا عزم تین پہ تینی کمکاری نا اونا لائخی ءِ بھاز خطرہ ٹی شاغانے۔ اقوام متحدہ ٹی پاکستان نا آخبتی مندوب منیر اکرم تدوک آ دے اقوام متحدہ نا جنرل اسمبلی ٹی ابحار و سمندر نا کانود آ شرہ ٹی خبڑدار کرے کہ جہانی برادری ءِ دا حقیقت آن آگاہی نا گرج ءِ کہ سویلی ایشیاٹی ہروڑنا فوجی جھیڑہ ڈیہہ نا سوگو ی ءِ خطرہ ٹی شاغنگ کیک ہرا جہانی واپار و جہانی امن و سلامتی کن بھاز اہم ءِ۔ اوجہانی واپار کن اہم ہند انا وڑاٹ بحرہند نا اہمیت ءِ مون آ تخسا پارے کہ دا جہانی سمندری ٹریفک نا آماجگاہ ءِ ہراٹی دنیا نا کنٹینرائزڈ کارگونا نیمہ، اونا بلک کارگونا اسہ تہائی و اونا تیل انا ترسیل نا اِرا تہائی بشخ اوار ءُ۔ اوپارے کہ مون آ بروک آ ویل، سمندری قزاقی و علاقائی آبی جھیڑہ غاتون اوار کرکی و سمندری وسیلہ غاتیا جہانی چاگڑدی زور پالیسی ساز آتے کن داسکان کافی چیلنج آتا سوب جوڑ مریک۔ اوسویلی بحیرہ چین نا ویل آتا بابت پارے کہ پاکستان نا موقف ءِ کہ جھیڑہ غاتا ایسرتعلقدار ملک آتا نیام اٹ مرے و پیشن نا ملک آک مذاکرات و دا عمل نا شرف ءِ کیر ہرانا کمک اٹ تعلقدار فریق جھیڑہ غاتے ایسر کننگ خواہک۔ اوپارے کہ پاکستان بحر ہند نا سیکورٹی فریم ورک اٹ اسہ اہم ءُ اسٹیک ہولڈر اسے ہراٹی بحری قزاقی نا توننگ تون اوار اوار انسانی اسمگلنگ و منشیات نا اسمگلنگ ہم اوار ءِ ، ہنداخاطرآن سمندر آتیٹی حکمرانی ءِ گچین کننگ و کانودی فریم ورک ءِ سوگو کننگ جہانی امن و سلامتی، تین پہ تینی رابطہ، بلیو اکانومی و آجو واپار کن المی ءِ۔ پاکستانی مندوب پارے کہ سمندر نا کانود آ اقوام متحدہ کنونشن (یو این سی ایل او ایس) نا جہانی معاہدہ نا منظوری و اوڑتون گنڈوک گورننگ ادارہ غاک غٹ بنی نو انسان کن سمندری وسیلہ غاتا منصفانہ کاریم اٹ اتنگ ءِ پک کننگ اٹ اہم ءُ کڑد اس ادا کرینے۔ اوپارے کہ یو این سی ایل او ایس انا رداٹ جوڑ مسہ ادارہ جہانی ٹریبونل فاردی لا آف سی، کمیشن آن دی لمٹس آف دی کانٹی نینٹل شیلف(سی ایل سی ایس) و انٹرنیشنل سی بیڈ اتھارٹی (آئی ایس اے) نا گام گیج آک ہم اہمیت تخرہ۔ اوغٹ ڈل آتیا زور شاغا کہ او بروک آ سیشن اٹی شون پسند نقطہ نظر اس تینا کیر و دا المی ءِ کہ گچین آب انا نتیجہ غاتا دوئی کننگ آ چکار کننگے ہرا اسہ امنائی ایسر اسکان سرمننگ نا قابل جوڑ کے۔ اوزور شاغا کہ جہانی زرگزران نا نظریہ سمندر و سمندر آتے اقتصادی شونداری نا محرک نا وڑاٹ امنا کیک ہراٹی جدت و نمو نا بھلو لائخی اسے۔ داٹی پاکستان نا است خواہی نا سوب اونا اسہ ہزار کلومیٹر مریس کرکی پٹی، 290 مربع کلومیٹر آ تالان خصوصی اقتصادی زون کراچی نا بندرگاہ و ساڑی ہی ٹی تفوک آ گوادر بندرگاہ ءِ۔ پاکستان نا مندوب منیر اکرم پارے کہ پاکستان سمندر آتا رکھ انا بابت پائیدار شونداری نا ہدف (ایس ڈی جی) نا دوئی کننگ کن سنبرینگوک ءِ و تین پہ تینی فائدہ غاتا دا ہدف نا دوئی کننگ کن پاکستان ڈیہہ و مچ آ دنیا نا ایلو سنگت ملک آتون کمک کننگ کن تیار ءِ۔
