پاک چین کثیر الجہتی تعلقداری تا سوب دفاع، معیشت ، ثقافت و تعلیم نا بشخ اٹی ودکی خننگ انگ اٹی بننگ ئِ، چین اٹی پاکستان نا سفیر مسعود خالد

اسلام آباد۔ 18مئی (اے پی پی) چین اٹی پاکستان نا سفیر مسعود خالد پارینے کہ پاک چین کثیر الجہتی تعلقداری تا سوب دفاع، معیشت ، ثقافت و تعلیم نا بشخ اٹی ودکی خننگ انگ اٹی بننگ ئِ و آخبت اٹی ہڑتوم آ ملک آک دا بشخ آتیٹی پین ودکی کننگ نا خواہش مندئُ۔ ریڈیو پاکستان نا پروگرام اٹی ہیت وگپ کرسا اوپارے کہ ہڑتوم آ ملک آتا راہشون پاک چین اقتصادی راہداری ئِ دوپیش سیکورٹی نا ویل آتے کم کننگ کن کوشست کننگ ئِ انتئے کہ دا ڈٹ ہڑتوم آ ملک آتون اوار ڈیہہ نا ایلو ملک آتے کن گیم چینجر ڈٹ اس ثابت مریک۔ مسعود خالد پارینے کہ چین سروک پاکستان فوج انا کنڈآن دہشت گردآتا برخلاف دوئی کروک آ سرسہبی و آپریشن ضرب عضب اٹی اہداف دوئی کننگ و عظیم قربانی تا بریبرئِ و ہڑتوم آ ملک آک اواری اٹ دہشت گردی و انتہاءپسندی نا برخلاف کمکاری ئِ برجاتخانو اوپارے کہ ہڑتوم آملک آتا نیام اٹ دفاعی ڈٹ آتا اعلیٰ مثال پاک چین مشترکہ کوشست آتیان تیار کروک آ جے ایف تھنڈر 17و چین نا کنڈآن پاک بحریہ ئِ فراوان کروک آ نیول فریکٹس ثابت کیرہ کہ ہڑتوم آ ملک آک دفاع نا بش اٹی کمک ئِ برجاتخانو۔ اسہ سوج اسینا ورندی ٹی اوپارے کہ بیجنگ و اسلام آباد اوغانستان نا باری ٹی اسہ وڑنا خیال تخرہ و پاک چین کثیر الجہتی تعلقداری ڈیہہ شون اٹی اہم کڑدادا کیرہ۔