ڈیرہ اسماعیل خان ۔ 17مئی (اے پی پی) وزیراعظم محمد نواز شریف پارینے کہ ننا مخالفین تا نصیب اٹی دھرنہ ئِ ، او دھرنہ ترسا کیر وخت اس کہ نن شون نا سفر ئِ برجاتخنہ، بدلی نا داوا کروک آک پوسکن ئُ خیبر پختونخواہ تو جوڑ کننگ کتوس پوسکن ئُ پاکستان اس انت جوڑ کرور، 2018ءنا گچین کاری تیان گڈ خیبر پختونخوا ہم اوفتے تون سلپک۔ پاکستان مسلم لیگ (ن) و جمعیت علمائے اسلام اواری اٹ پوسکن ئُ پاکستان اس جوڑکینہ، میگاپروجیکٹس خاص کر شاہرات آتا ڈٹ آک ملک انا تقدیر ئِ بدلیفیرہ۔2018 ءٹی بجلی نا لوڈشیڈنگ ختم مریک۔ وزیراعظم ڈیرہ اسماعیل خان اٹی کشاری یونیورسٹی نا اڈتننگ، 50کروڑ روپئی نا شونداری فنڈز، چشمہ رائٹ بینک کینال ڈٹ اکن 120 روپئی آن بیدس ٹانک زام ڈیم انا فزیبلٹی سٹڈی کن 8 کروڑ روپئی نا ہم پڑوئِ کرے و ڈیرہ اسماعیل خان بالی پٹ آن اے ٹی آر جہاز آتا ہندی و بین الاقوامی جہاز آتے کن سول ایوی ایشن ئِ کاریم شروع کننگ نا پارت کرینے۔ او ڈیرہ اسماعیل خان اٹی گیس انا فراوانی نا ڈٹ انا بنداوئِ تخنگ نا وخت آ السی مچی آن تران کریکہ۔ داوخت آ گورنر خیبر پختونخوا اقبال ظفر جھگڑا، جے یو آئی (ف) نا امیر مولانا فضل الرحمان ، بنجائی وزیر ہاﺅسنگ اکرم خان درانی و بڑزکو کمامدار آتیان بیدس پاکستان مسلم لیگ (ن) و جے یو آئی (ف) نا کارندہ غاتا بھلو کچ اسیٹی ساڑی ئسر۔ وزیراعظم پارے کہ اونا است خوائسکہ کہ ڈیرہ اسماعیل خان و داجاگہ نا بندغ آتے کن گڑاس کین کان، اینو او زبانی پڑو کننگ کن آخا بلکن عملی کاریم کننگ کن بسنے۔ وزیراعظم پارے کہ ڈیرہ اسماعیل خان اٹی گیس انا فراوانی نا ڈت انا بنداو ئِ تخانے ہراڑآن علاقہ نا لکھ آ بندغ غاتے فائدہ مریک۔ اقتصادی راہداری ہم ڈیرہ اسماعیل خان آن گدرینگ انگ ئِ ،زوت اسیٹ ریلوے لین ہم داکان گدرینگک، ہکلہ آن ڈیرہ اسماعیل خان و ولدا ڈیرہ آن ژوب اسکان موٹروے کاہک، اوڑآ ارب آ روپئیک خڑچ مریرہ، دا ڈٹ ملک انا تقدیر ئِ بدلیفنگ نا ڈٹ ئِ۔ وزیراعظم مچی ٹی شریک الس آن ہریفے کہ اوفتے تینا خڑک جاگہ اس پوسکن ئُ پاکستان جوڑ مرسا نظر بسنے ہراڑآ ساڑی گرآک نفی ٹی ورندی تسر۔ وزیراعظم محمد نواز شریف پارے کہ ای داڑے تینا مخالفین آتا ہیت ئِ کننگ کن بتنوٹ ، اوفتا نصیب اٹی دھرنہ غاک ئُ و او دھرنہ ترسا کیر ، نن تینا ملکی شون نا سفرئِ برجاتخنہ۔ اوپارے کہ بدلی نا داوا کروک آک پوسکن ئُ خیبر پختونخوااس تو جوڑ کننگ کتوس و پوسکن ئُ پاکستان اس جوڑ کننگ نا ہیت ئِ کننگ ئُ۔ اوفتے معلوم مرے کہ اوفتا کارکڑد نا بناءآ خیبر پختونخوا اوفتا دوتیان پیش تمنگ ئِ ، پشاور نا ساڑی آ ضمنی گچین کاری تیٹی او باتسنو، پی ٹی آئی چارمیکو نمبر آ بسنے۔ اوپارے کہ مسلم لیگ (ن) لاہور، ملتان و راولپنڈی ٹی میٹروبس نا بنائِ کرے و او پشاور کون آ بھلا شار اٹی ہم دنو ڈٹ جوڑ کننگ کتو، پشاور نا خلقت آتے سماتمانے کہ دا پوسکن ئُ پاکستان اس جوڑ کننگ افس، 2018ءنا گچین کاری تیٹی خیبر پختونخوا اوفتے تون سلپک۔ وزیراعظم پارے کہ او مولانا فضل الرحمان و اونا جماعت نا منت وار ئِ ہراک اصول آتیا اوڑتون تفیر، انشاءاللہ فتح ننا مریک، و نن ضرور سرخرومرینہ۔ اوپارے کہ اینو اسہ پوسکن ئُ پارٹنر اس جوڑ مننگ کن ہِننگ ئِ ہرا پاکستان نا شون و شونہالی کن کاریم کیک و دا پارٹنر شپ دیرپار مریک، مسلم لیگ(ن) و جمعیت علمائے اسلام اواری اٹ پوسکن ئُ پاکستان اس جوڑ کیرہ۔ وزیراعظم داوخت آ ڈیرہ اسماعیل خان اٹی کشاری یونیورسٹی نا اڈتننگ و پنجا کروڑ روپئی نا شونداری فنڈ انا پڑوئِ کرے۔ اوپارے کہ ڈیرہ اسماعیل خان اٹی انٹرنیشنل بالی پٹ نا جوڑ مننگ نا انتظار ئِ کننگ پننگک دا چرجوئی ٹی سول ایوی ایشن اتھارٹی و پی آئی اے ئِ پارت کیوہ کہ او ڈیرہ اسماعیل خان بالی پٹ آن اے ٹی آر جہاز آتا ہندی و بین الاقوامی جہاز آتے شروع کننگ نا بست و بند کیر تانکہ علاقہ نا خلقت آتے فضائی سفر نا مناسب آسراتی دوبننگ کے۔ وزیراعظم ڈیرہ اسماعیل خان اٹی گیس انا فراوانی نا ڈٹ آتے کن 77کروڑ روپئی تخنگ نا پڑوئِ ہم کرے۔ اوچشمہ رائٹ بینک کینال ڈٹ اکن 120 ارب روپئی نا پڑوئِ کرسا پارے کہ دا بے کچ اہمیت نا حامل ئِ دا نا پوروی آن 3لکھ ایکڑ رقبہ سیراب مننگ کیک۔ اوپارے کہ ڈٹ انا بابت تکنیکی کاریم ئِ مسہ تو اٹی پورو کننگے، دا ڈٹ انا خڑچ انا 65درسد بنجائی حکومت و 35درسد صوبائی حکومت ادا کیک۔ او ٹانک زام ڈیم انا فزیبلٹی سٹڈی کن 8کروڑ روپئی تخنگ نا پڑوئِ کرے و پارے کہ ڈیرہ اسماعیل خان ئِ جلاب آن بچفنگ کن رکھوکی بند انا فزیبلٹی سٹڈی آ ہم کاریم نا بنائِ کننگک۔ وزیراعظم پارے کہ علاقہ ٹی روڈ آتا جوڑ جاڑ و گیس انا فراوانی تون اوار اوار ہڑزان بجلی ہم فراوان کننگک و 2018 ءٹی بجلی نا لوڈشیڈنگ ختم مریک۔
