اقوام متحدہ۔ 18 نومبر (اے پی پی) پاکستان جہانی برادری نا چکار ءِ اوغانستان ءِ مون تروک انسانی و زرگزرانی تنکی تا کنڈآن کرفسا زور شاغانے کہ جنگ آن زہمی ملک ءِ دا حالیت آتیان پیش تمنگ نا قابل جوڑ کننگ کن بے سوب منجمد کروک آ اونا میرات آتے بحال کننگے۔ اقوام متحدہ ٹی پاکستان نا آخبتی مندوب منیر اکرم تدوک آ دے اوغانستان نا حالیت آتیا اقوام متحدہ نا سلامتی کونسل نا دیوان اٹی داہیت ءِ تالان کرسا پارے کہ داوخت آ 2 کروڑ 80 لکھ اوغان شاری غذائی بے سوگوی تون مون تننگ ءُ ہنداخاطرآن زرگزران نا بحالی، تنخواہ تا زرتس، چنکا کاروبار و بینکاری نا نظام نا بحالی کن نغد زر انا گرج ءِ۔ اوخبڑدار کرے کہ اوغانستان اٹی اسہ بھلو انسانی تنکی و زرگزرانی بھسکاری نا نتیجہ غاک ہولناک مریرہ، بھلو کچ اسے آ انسانی ویل، پین لکھ آ اوغان مہاجر آتا پیش تمنگ، ہڑدڑنا گمان، پین جھنگ و جھیڑہ و داعش و ایلو دہشت گرد پڑک آتے سوگو ی ملک۔ اوپارے کہ ہراتم لکھ آ اوغان مہاجر ننا سیم تیا بننگ نا بناءِ کیرہ تو نن ہرامہالو آن 40 لکھ اوغان مہاجرآتا مہمانداری ءِ کننگ اُن، پین اوغان مہاجر آتے سگنگ کپنہ اوفتے پین جاگہ سے آ ہنوئی تمک و جہانی برادری ءِ داوڑنا نتیجہ غاتیان پاناد کروئی مریک۔ پاکستانی مندوب منیر اکرم پارے کہ اوغانستان اٹی سلامتی نا حالیت آتے ٹی بھلو حد اسسکان گچینی بسنے۔ اوغانستان نا عبوری حکومت اوغان الس ءِ کمکی کارندہ بشمول زالبول کمکی کارندہ غاتا کمک اٹ براہ راست امداد نا فراوانی نا موکل و آسراتی فراوان کرینے و اوغانستان ہمسایہ ملک آتون اوار جہانی برادری تون رابطہ غاتا مثبت ورندی اس تننگ ءِ۔ اوخبڑدار کرے کہ گڑاس زموار داسہ ہم اوغانستان ءِ نزور کننگ کن چم آتے ٹی اختہ ءُ ہرافتے بے نقاب کننگے۔ پاکستانی مندوب دیوان اٹی اوغانستان نا مسکوہی صدر اشرف غنی نا حکومت نا پندار کروک مسکوہی اوغان سفیر غلام اسحاق نئی نا بشخ ہلنگ آ اعتراض کرسا پارے کہ سلامتی کونسل ءِ یک فریقی شرہ نا جاگہ غا ہموفتا ہیت ءِ بِننگ آن فائدہ مریک ہرا دراصل کابل اٹ حکومت کننگ ءُ۔ اواقوام متحدہ نا سیکرٹری جنرل، اقوام متحدہ، جہانی تنظیم کون آ ورلڈ فوڈ پروگرام (ڈبلیو ایف پی)، اوسی ایچ اے، یو این ڈی پی، یونیسیف، ورلڈ ہیلتھ آرگنائزیشن (ڈبلیو ایچ او)، فوڈ اینڈ ایگریکلچرآرگنائزیشن (ایف اے او) و ایلو تنظیم تا کنڈآن اوغان الس نا کمک ءِ کننگ نا کوشست آتا ستاءِ کرسا پارے کہ انسانی و زرگزرانی بھسکاری آن بچنگ کن پین کمک نا گرج ءِ۔ اوزور شاغاکہ ہڑتوم آ کنڈآتا و سلامتی کونسل نا پابندی تا سوب آن انسانی ہمدردی نا تنظیم تے ہم عملی چیلنج آتا مون تروک ءِ ہنداخاطرآن انسانی امداد غیر مشروط مرے و ننے اومیت ءِ کہ جوان ءُ فیصلہ کننگک تانکہ اقوام متحدہ و ایلو تنظیم تے اوفتا عملی ویل آتا مون ءِ توننگ نا قابل کننگ مرے ہرا اوغان الس کن بھاز المی امداداٹ اڑاند ءِ۔ اوپارے کہ پاکستان اوغانستان کن 3 کروڑ ڈالر امداد اتون اوغانستان نا ہرممکن کمک کننگ ءِ و خولم، برنج، دوائی و المی آ گڑا ہمونگیا گدریفنگ انگ ءِ و داآخا نن اوغان گڑاتا درآمد آ ڈیوٹی ءِ چٹفینن۔ نن ٹرانزٹ ٹریڈ اٹ آسراتی تننگ اُن، المی ءُ دوائی فراوان کننگ اُن، اوغان ہسپتال آتے پوسکن کننگ اُن وخت اس کہ پاکستان ورلڈ فوڈ پروگرام ءِ اسلام آباد آن کابل 10 ہزار ٹن خولم گدریفنگ کن آسراتی فراوان کرین۔ اوپارے کہ پاکستان اٹ اوغانستان نا حالیت آتیا مروک آ ودیکی ٹرائیکا پلس دیوان نا باسک آک اومیت کریر کہ اوغانستان اٹ شمولیت نا عمل، انسانی حق، مسن تا تعلیم و زالبول آتا شرکت، مسکوہی سرکاری کارندہ غاتا برخلاف انتقامی کارروائی تا توننگ، اوغانستان اٹ دہشت گرد تنظیم تا ساڑی گری نا چٹفنگ و منشیات نا اسمگلنگ نا مون ءِ توننگے۔
