کوئٹہ۔ 04 نومبر (اے پی پی) پاکستان پیپلزپارٹی بلوچستان نا صوبائی صدر میر چنگیز خان جمالی پارینے کہ پی پی پی زمی جمب نا زہمی تا بحالی کن غٹ ممکن گام گیج کیک، مشکل نا داساہت اٹ پیپلزپارٹی و سندھ حکومت ہرنائی نا زہمی تتون تفوک ءُ، وزیراعلیٰ سندھ سید مراد علی شاہ کمکی گڑاتے ہرنائی زمی جمب نا زہمی تیکن ایسونے ہراٹی چار ہزار تمبو، ہزار کمبل و ایلو گڑاک اوار ءُ ۔ داخیال آتا درشانی ءِ او ہرنائی ٹی زمی جمب نا زہمی تیٹی تمبو،کمبل و راشن بشخنگ نا وخت آ میڈیا تون گپ وتران کرسا کرے۔ داوخت آ سیکرٹری حوالکاری سردار سربلندخان جوگیزئی ہم پارٹی سرکڑدہ غاتون اوار ساڑی ئسک۔ میرچنگیز خان جمالی پارے کہ چیئرمین بلاول بھٹو زرداری نا پارت آ سندھ حکومت زمی جمب نا زہمی تا مفت درمان نا پڑو ءِ ہم کریسس۔ سیکرٹری حوالکاری سردار سربلند خان جوگیزئی پارے کہ پیپلزپارٹی تینا زمی جمب نا زہمی ایلم تا ڈکھ اٹی بریبرنا شریک ءِ و اوفتے ہرممکن کمکاری نا باوری کرفک۔ داوخت آ ضلع ہرنائی نا صدریاسین خان ترین، جنرل سیکرٹری ملک شین گل، صوبائی میڈیا کوآرڈنیٹر حیات خان اچکزئی، رخشان ڈویژن نا صدر نعیم بلوچ، صوبائی راہشون قاسم اچکزئی، جہانگیر ترین، شاہ زیب بھٹو، حاجی نور محمد ترین و ایاز جمالی تون اوار پارٹی نا ایلو عہدیدار و کارندہ غاک ہم صوبائی سرکڑدہ غاتون اوار ئسر۔
