ڈیرہ اسماعیل خان ۔17مئی (اے پی پی) مزن وزیر محمد نواز شریف ئَ گوشتگ کہ مئے ھلاپ کنوک آنی نصیب ئَ جاک ئُُ کوکار اِنت، آ جاک ئُُ کوکار بکن اَنت ما ملک ئِ دیمروئی ئِ کار اں جاڑی کن آں۔ مٹی ئِ گوھ ئَ ورکیں مردم آں نوکیں خیبر پختونخوا جوڑ کُت نہ کُت ، نوکیں پاکستان ئِ گوھ ئَ ورنت۔ 2018ئِ گچین کاری ئَ پد خیبر پختونخوا ھم آئی کِرا پشت نہ کیپت۔ پاکستان مسلم لیگ (ن) ئُُ جمیعت علما ءاسلام یکجاھ بنت ئُُ نوکیں پاکستان ئَ جوڑ کن اَنت۔ میگا پراجیکٹس ھاسیں رنگ ئَ جوانیں دگ ئِ منصوبگ ملک ئِ کسمت ئَ مٹ کنت۔ 2018ئَ توان ئِ کمیگ ئَ را ھلاس کنگ بیت۔ مزن وزیر محمد نواز شریف ئَ ڈیرہ اسماعیل خان ئَ کشت ئُُ کشاری شاہ دربر جاھ ئِ جوڑ کنگ ئِ ھاترا 50کروڑ کلدار ، چشمہ رائٹ بینک کینال منصوبگ ئِ ھاترا 120ارب کلدار ئَ ابید ٹانک زام ڈیم ئِ فزیبلٹی سٹڈی ئِ واستہ 8کروڑ کلدار ئِ ھم جار جت ئُُ ڈیرہ اسماعیل خان ئَ بالی پڑ ئَ اے ٹی آر بالیگ آنی ھندی ئُُ میاں اوستامنی بال ئِ ھاترا سول ایوی ایشن ئَ را کار ئِ بندات کنگ ئَ ہدایت جاڑی کُت۔ آ ڈیرہ اسماعیل خان ئَ گیش ئِ پُجاری ئِ منصوبگ آنی بُن ھشت ئِ ایر کنگ ئِ موہ ئَ اُلسی مُچی ئَ گوں تران کنان اَت۔ اے موہ ئِ سر ئَ خیبر پختونخوا ئِ گورنر ظفر اقبال جھگڑا ، جے یو آئی (ف) ئِ امیر مولانا فضل الرحمٰن، ہاﺅسنگ ئِ وزیر اکرم خان درانی ئُُ ٹوھیں ٹوھیں پاکستان مسلم لیگ (ن) ئُُ جے یو آئی (ف) ئِ باسک آنی مزنیں کساس ئِ ساڑی اَت۔ مزن وزیر ئَ گوشت کہ آئی ئِ دل ئَ لوٹیتگ کہ ڈیرہ اسماعیل خان ئِ دمگ ئِ مردماں پہ دیروئی کار ئِ بکنت ئُُ برو، مرچی آ زبانی جار ئِ جنگ ئَ نہ اتکگ ، بلکینگ ئَ گواچنی رنگ ئَ کار بکنت۔ مزن وزیر ئَ گوشت کہ ڈیرہ اسماعیل خان ئَ گیس ئِ پُجاری ئِ منصوبگ آنی بُن ھشت ئَ ایر کتگ، ایشی ئَ دمگ ئِ مردم آں نپ ئُُ سیت رسیت۔ اقتصادی راہداری ھم ڈیرہ اسماعیل خان ئَ چہ گوزگ ئَ اِنت، زوت ریل گاڑی ھم چمداں گوزیت۔ ہکلہ ئَ چہ ڈیرہ اسماعیل خان ئُُ دپ ئَ ژوب ئَ تاں موٹروے روت۔ ایشی ئِ سر ئَ اربانین کساس ئَ زر ھرچ ئُُ درچ بیت۔ اے منصوبگ ملک ئِ بھت ئَ را مٹ کنگ ئِ منصوبگ اَنت۔ مزن وزیر ئَ مُچی ئِ مردماں گوں جُست گپت کہ آواں نوکیں پاکستان گندگ بوھگ ئَ اِنت۔ آواں پسو دات کہ اِناں۔ مزن وزیر ئَ گوشت کہ آئی ئِ ھلاپ کنوک آںبنوں ئَ مچی ئِ ساھت ئَ آوا چہ سے3جُست کتگ اَت۔ آواناں اِناں ئِ تہ ئَ پسو رستگ۔آئی ئَ گوشت کہ آئی ئِ ھلاپ کنوک آنی بھت ئَ جاک ئُُ کوکار نبشتگ اِنت، آ بل اِت جاک ئُُ کوکار کن اَنت۔ ما وتی ملک ئِ دیمروئی ئِ سفر ئَ جاڑی کن آں ۔ آئی ئَ گوشت کہ نوکیں پاکستان ئِ جوڑ کنگ ئِ گوھ ئَ وروک ، نوکیں خیبر پختونخوا ئَ پیش بدار اَنت، آواں وتی ھند ئُُ دمگ ئَ گوں لُچی کتگ، آ ھُشکا گوھ ور اَنت۔آ بزان اَنت کہ آوانی کرد چون اِنت گوں آوانی جندے حلقہ ئَ گوں ، آواں گچین کاری ئَ ھار داتگ، پی ٹی آئی چارمی لمبر ئَ اتکگ۔ آئی ئَ گوشت کہ مسلم لیگ (ن) ئَ لاہور، ملتان ئُُ راولپنڈی ئَ میٹروبس بندات کتگ، بلے سد اپسوز کہ پشاور وڑیں مزنیں دمگے ئَ آواں میڑو ئِ مٹوگری ئَ اِچ منصوبگ جوڑ نہ کتگ۔ پشاور ئِ مردم شرسرپد بوتگ اَنت کہ اِچ نوکیں پاکستان جوڑ بوھگ ئَ اِنت۔ 2018ئِ گچین کاری ئَ خیبر پختونخوا آوانی کرنہ بنت۔مزن وزیر ئَ مولانافضل الرحمن ئُُ آئی ئِ پارٹی ئِ سک باز شُگر ئُُ منت گپتگ۔ آئی ئَ گوشت کہ انشاءاللہ باج برئی مئے بیت۔ آئی ئَ گوشت کہ مرچی دَگہ یک پارٹنر شپجوڑ بوھگی اِنت ، ایش ملک ئِ دیمروئی ئُُ وشھالی ئِ ھاترا کار کنت۔ اے باز دیراں تاں مانیت۔ مسلم لیگ (ن) ئُُ جمیعت علمااسلام یکجائی ئَ نوکیں پاکستان ئَ وڑ کن اَنت۔ مزن وزیر ئَ ڈیرہ اسماعیل خان ئَ گیس ئِ پُجاری ئِ منصوبگ ئِ ھاترا 77کروڑ کلدار ھرچ ئُُ درچ ئِ جار جتگ۔ آئی ئَ گوشت کہ چشمہ رائٹ بینک کینال منصوبگ ئِ واستہ 120ارب کلدار ئِ جار ئَ جنان ءَ گوشت کہ اے سک باز المی اِنت، ایشی ئِ سرجمی 3لکھ ایکڑ دراجی سیراب بیت۔ آئی ئَ گوشت کہ منصوبگ ئِ ھوالگ ئَ تکنیکی کار سئے 3ماھ آنی تہ ئَ سر جم کنلگ بنت، اے منصوبگ ئِ ھرچ ئُُ درچ65درسد بُنجاھی حکومت ئُُ 35درسد صوبائی حکومت دنت۔ آئی ئَ ٹانک زام ڈیم ئِ فزیبلٹی سٹڈی ئِ ھاترا 8جروڑ کلدار گیشینگ ئِ جار جتگ ئُُ گوشتگ کہ ڈیرہ اسماعیل خان ئَ را سیلاب ئَ چہ بچارینگ ئِ ھاترا رکھینگی بند فزیبلٹی سٹڈی ئِ سر ئَ کار بندات کنگ بیت۔ مزن وزیر ئَ گوشت کہ دمگ ئَ سڑک آنی جوڑ کنگ ئُُ گیس ئِ پُجاری ئَ ھوار سستائیں توان ئِ پُجاری ھم کنگ بیت ئُُ 2018ئَ توان ئِ لوڈشیڈنگ ھلاس کنگ بیت۔
