کوئٹہ۔ 24ستمبر (اے پی پی) بلوچستان عوامی پارٹی اسٹوڈنٹس فیڈریشن نا صوبائی صدر رحمت اللہ کاکڑ پارینے کہ صوبائی حکومت وزیراعلیٰ بلوچستان جام کمال خان نا کماشی ٹی مسہ سال اٹی 18ہزار آن زیات بے روزگار ورناتے ملازمت فراوان کرے وخت اس کہ صوبہ ٹی ریکارڈ شونداری ڈٹ آتے پورو کننگانے ہراڑآن الس پبی فائدہ ہرفنگ ءِ، ساڑی آ اسہ گیلپ سروے اسے ٹی بی اے پی نا سرکڑدہ وزیراعلیٰ بلوچستان کارکڑد نا بنداو آ غٹ صوبہ غاتے پدی ہلانے۔ داہیت ءِ او پارٹی نا مرکزی سیکرٹریٹ اٹی بلوچستان عوامی اسٹوڈنٹس فیڈریشن نا کارندہ غاتون گپ وتران کرساپارے۔ اوپارے کہ ساڑی آ مخلوط صوبائی حکومت وزیراعلیٰ بلوچستان جام کمال خان نا کماشی ٹی چنکو وخت اسے ٹی صوبہ نا ڈسٹرکٹ اٹی اسپورٹس کمپلیکس نا تفنگ، کالج و اسکول آتا جوڑ کننگ، طالب علم آتے کن وزیراعلیٰ اسکالرز شپ و لیپ ٹاپ نا بشخنگ، سریاب روڈ انا ودکی، صوبہ ٹی پوسکن آ آسراتی تیان شپ کینسر ہسپتال نا تفنگ، نواں کلی بائی پاس، گرلز ڈگری کالج سبزل روڈ، جان جوڑی کارڈ انا بنا و 18ہزار بے روزگار ورناتے ملازمت آتا فراوانی ءِ پک کرینے ہنداسوب ءِ کہ مچ آ صوبہ نا الس وزیراعلیٰ جام کمال خان تون تفوک ءُ۔ اوپارے کہ وزیراعلیٰ جام کمال خان صوبہ نا شونداری و شونہالی نا کنڈآ درینے بلوچستان عوامی پارٹی بروک آ لس گچین کاری تیٹی تینا کارکڑد نا بنداو آ بشخ ہلسا پبی سرسہبی دوئی کیک۔ اوپارے کہ بلوچستان عوامی اسٹوڈنٹس فیڈریشن نا کارندہ غاک تینا سرکڑدہ وزیراعلیٰ بلوچستان جام کمال خان نا کماشی آ گمرکیرہ و وزیراعلیٰ بلوچستان جام کمال خان تون ہم کوپہ سلوک اُن۔