اقوام متحدہ۔ 20ستمبر (اے پی پی) اقوام متحدہ نا سیکرٹری جنرل انتونیوگوتریش پارینے کہ دینی مرض کورونا و چاگڑدی بدلی کون آ جہانی چیلنج آتے ٹی غٹ ملک آتا اوار مننگ المی ءِ۔ جنرل اسمبلی نا 76می دیوان آن مست اقوام متحدہ نا سیکرٹری جنرل انتونیوگوتریش اسہ انٹرویو اسے ٹی پارے کہ دنیا ءِ بچفنگ کن غٹ ملک آتا حکمران تے سیوت کروئی مریک۔ اوجہانی دینی مرض کورونا دین انا بارواٹ ہیت کرسا اسہ بریبری جہانی ویکسی نیشن پلان اسے آ زور شاغا۔ اوپارے کہ کورونا دین ہرانا چندی دروشم پاش مننگ ءِ داڑآن دنیا نا اسہ ملک اس ہم رکھوک اف۔ اوپارے کہ اسہ دین اس دنیا ءِ شکست تسنے و دادین ننا زند آتا ڈرامائی اثراس مرتب کرینے ہراڑآن جہانی بے بریبری ٹی ودکی، زرگزران نا تمنگ کون آ مصیبت آک اوار ءُ۔ ہمو ملک آک ہرا، ورلڈ ہیلتھ آرگنائزیشن و جہانی مالیاتی ادارہ غاتون ویکسین تیار کننگ ءُ، اوفتے داہیت ءِ پک کننگ نا گرج ءِ کہ ویکسین نا غٹ ملک آتے ٹی ساف تقسیم مرے۔ اوپارے کہ اسہ ملک اس ہم دادین انا تنیا مقابلہ ءِ کننگ کپک و داڑکن غٹ ءِ اوار ہِننگ نا گرج ءِ۔
