اسلام آباد۔ 16مئی (اے پی پی) وزیراعظم محمد نواز شریف تینا غٹ میرات و خراج آتا ادائیگی نا سرجم آتے قومی اسمبلی ٹی پیش کرسا پاناما پیپرز نا جاست و پاست کن جامع ٹرمز آف ریفرنس تیار کننگ کن قائد حزب اختلاف و پارلیمانی پارٹی تا سروک آتیا تالان کمیٹی اس جوڑ کننگ نا پارینے، لندن اٹی فلیٹ 2005ءٹی جدہ ٹی 17ملین ڈالر نا خڑچ آن بہاءکروک آ اسٹیل ملز آن ہلنگا، جدہ اسٹیل ملز و لندن اٹی فلیٹس ناہلنگ کن اسہ روپئی اس ہم پاکستان آن پیشن ہنتو،ننا دامن صفائِ، ہچ ئُ آئینی ، کانود استثنیٰ سینا گرج اف ، مسکوہی ٹی کڑے و اسہ پلوی احتساب اٹ سرخرو مرسا گدرینگانوٹ، اگہ ہنداوڑاٹ دوبہ غاک لگسا کریر تو سیاستدانک بے وقار و جمہوریت بے توقیر مریک، نن خوانہ کہ پال انا پال دیر انا دیر مرے، غٹئِ تول کروئی ئِ تو اسہ ترازوسیٹی تول کروئی ئِ، بدعنوانی ، واک آتا ناجائز کاریم اٹ اتنگ، خراج دُزی، ارب آ روپئی تا کڑز آتے بشخفنگ ، غیر کانودی وڑاٹ پیسہ غاتے پیشن گدریفوک آتا کسہ ہم الس نا مون آ بایدے برے۔ 2018ءنا پاکستان اینو نا پاکستان آن زیات روشن، پرامن ، سوگو و توانا مریک۔ دوشنبے آ قومی اسمبلی نا دیوان اٹی پالیسی بیان ترسا وزیراعظم پارے کہ اینخو نا سال اپریل نا اولیکو ہفتہ ٹی پاناما پیپرز نا بابت اسہ رپورٹ اس میڈیا ٹی بس، اوٹی ہندن انگا آف شور کمپنی تا پیدواری کننگا ہراٹی پاکستانی تا تعلق ہم پاننگا۔ اوٹی داصفا کننگاسس کہ المی اف کہ دا آف شور کمپنیک غیر کانودی مریر۔ کنا اِر امار انا پن ہم اوٹی بس ہرامسکوہی بھلو وخت اسیان پیشن نا ملک اٹی رہینگ انگ ئُ و ایلو لکھ آ پاکستانی تیانبار ہموڑے حلال نا رزق کٹنگ ئُ۔ اوپارے کہ کنے کنا سنگت آک صلاح تسر کہ چونکہ کنا پن اوٹی اوار اف ہنداخاطران کنے تینے احتساب کن پیش کروئی مف واہم ای المی سمجھاٹ کہ کنا خاہوت نا پن اوٹی اوارے ہنداخاطران قوم آن تران اٹی اپوزیشن نا خواست آن مست ہی سپریم کورٹ نا ریٹائرڈ جج انا سروکی ٹی کمیشن اس اڈتننگ نا پڑوئِ کریٹ۔ انصاف نا بڑزکو انگا ادارہ غاتے ٹی تعینات دا جج آک ریٹائرڈ مننگ نا باوجود ہم انصاف نا بے لاگ گرج آتے پورو کننگ کیرہ ۔ واہم ہندن ئُ چاگڑد ودی کننگا کہ بے کچ گچین ساکھ انا حامل مسکوہی چیف جسٹس ہم کمیشن نا سروکی آن انکار کریر۔ اوکان گڈ پارلیمانی کمیٹی نا صلاح مون آ بس ہراڑآ نن گچین ردعمل ظاہر کرین واہم اوڑآہم اپوزیشن پد ی مس۔ اوکان گڈ ایف آئی اے آن جاست و پاست نا خواست کننگا تو اوڑآہم نن اودے تینا پسند نا آفیسر پندار کننگ نا پیش کش کرین۔ ولدا حاضر سروس چیف جسٹس نا سروکی ٹی کمیشن اس اڈتننگ نا خواست کننگا تو اوڑآہم 22اپریل آ قوم آن تینا تران اٹی دا خواست ئِ امنا کرسا کمیشن اس جوڑ کننگ نا پڑو کریٹ واہم اودے ہم مسترد کننگا و حکومتی ٹی او آرز ئِ مسترد کرسا ٹی او آرز نا 15پوسکن ئُ ٹک تننگا۔
