کوئٹہ۔ 16ستمبر (اے پی پی) پاکستان تحریک انصاف نا صوبائی راہشون حمزہ خان ناصر سویلی وزیرستان اٹ دہشت گرد آتا سم کاری آن 7فوجی ورناتا شہیدی آ است ہسونی نا درشانی ءِ کرساپارینے کہ سیکورٹی فورس آتیا جلہو آتے ٹی اوار دہشت گردآک انسان پاننگ نا حقدار افس، الس نا جان ومال انا رکھ و دہشت گردی نا چٹفنگ کن تینا جان تے ندرکروک آ سیکورٹی فورس انا کارندہ غاک ننا پیشانی نا جھومرءُ ہرافتا قربانیک زیان مفسہ۔ داڑے جاری مروک اسہ بیان اسے ٹی حمزہ خان ناصر تدوک آ دے سویلی وزیرستان اٹی دہشت گرد آتا برخلاف آپریشن اٹی اسہ ایلو آ سم کاری ٹی پاک فوج انا 7ورناتا شہیدی آ است ہسونی نا درشانی ءِ کرسا پارینے کہ ملک دشمن زموارآک تینا درملکی آقاتے خوش کننگ کن سیکورٹی فورس و بے گناہ شاری تے دہشت گردی نا شست کننگ ءُ داوڑنا ہتھکنڈاغاتیان دہشت گرد آک پاک فوج و سیکورٹی فورس آتا حوصلہ ءِ شیف شاغنگ کپسہ۔ اوپارے کہ ملک آن دہشت گردی نا چٹفنگ کن پاک فوج و سیکورٹی ادارہ غاتا ورناک تینا جان تا نذرانہ ءِ پیش کننگ ءُ ہرافتے مچ آ قوم خراج عقیدت پیش کیک۔اوپارے کہ انشاء اللہ ہمو دے مر اف ہراتم پاک فوج و ایلو سیکورٹی ادارہ غاک اواری اٹ ملک آن دہشت گردآتے پورو صفایا ءِ کیرہ۔ او اسہ ایلو آ سم کاری ٹی شہید مروک آ پاک فوج انا کارندہ غاتا خاہوت آتون ہڑزخواہی نا درشانی ءِ کرے۔
