کوئٹہ۔ 16مئی (اے پی پی) بلوچستان نا 6جامعہ غاتا150طالب علم آک کوئٹہ کینٹ اٹی آرمی پبلک اسکول پشاور و دہشت گردی نا ایلو واقعہ غاتے ٹی شہید مروک آ شہید آتا یات گار آ پھل آتا چادراس شاغار وپاکستان نا امن و سلامتی و دہشت گردی نا برخلاف پاک فوج انا ورناتا ہم کوپہ اوار ہِننگ نا عہد کریر۔ سرجم حوال آتارداٹ ڈیوٹ آرگنائزیشن بلوچستان نا کنڈآن دوشنبے آ کوئٹہ ٹی بلوچستان یونیورسٹی کوئٹہ، تربت یونیورسٹی کیچ، لسبیلہ یونیورسٹی آف ایگریکلچر واٹر اینڈ منرل سائنسز اوتھل، یونیورسٹی آف لورالائی، الحمد اسلامک یونیورسٹی کوئٹہ ، بلوچستان یونیورسٹی آف انفارمیشن ٹیکنالوجی اینڈ مینجمنٹ سائنسز کوئٹہ نا وائس چانسلرز و پوزیشن ہولڈرز طالب علم آک تینا اسہ دے اسے پاک فوج انا ورناتتون گدریفیر و پاک فوج انا سلہہ غاتا نمائش نا معائنہ ئِ کریر وخت اس کہ بلوچستان نا 6یونیورسٹی تا 150استاد وطالب علم آک دہشت گردی نا واقعہ غاتے ٹی شہید مروک آ شہید آتے کن فاتحہ خوانی کریر و پاک فوج انا ورناتے تون یکجہتی نا درشانی ئِ کریر۔ داوخت آ ڈیوٹ آرگنائزیشن بلوچستان نا چیف ایگزیکٹو آفیسر سلمیٰ محمد حسنی”اے پی پی“ تون ہیت و گپ کرسا پارے کہ بلوچستان نا جامعہ غاتا ذہین پوزیشن ہولڈرطالب علم آتا است بڈی کن 5دے وزٹ پلان ردوبند تننگانے ہراٹی اسہ دے پاک فوج انا ورناتیان بیدس اوفتا گورنر محمد خان اچکزئی و کمانڈر سدرن کمانڈ جنرل عامر ریاض تون اوڑدہی و طالب علم آتے پنجاب نا کیہی تاریخی ہند، پنجاب اسمبلی و جامعہ پنجاب نا دورہ کرفنگک۔ اوپارے کہ بین الصوبائی تین پہ تینی رابطہ غاتا مون آ دننگ و قومی یکجہتی کن داوڑنا پروگرام آتا آخبت اٹی ہم بنائِ کننگک تانکہ پنجاب و بلوچستان نا جامعہ غاتیٹی زیر تعلیم طالب علم آک اسہ ایلو نا آزموندہ و مشاہدہ غاتیان استفادہ کرسا پاکستان نا شون و شونہالی ٹی تینا پبی کڑدئِ ادا کننگ کیر۔
