کوئٹہ۔ 19جولائی (اے پی پی) صوبائی وزیر ریونیو میر سلیم احمد خان کھوسہ پارینے کہ پٹ فیڈر کینال و ذیلی شاخ تے ٹی دیر انا کمتی نا ویل دے پہ دے آ ودسا ہِننگ ءِ، تدوک آ دے تیٹی وزیراعلیٰ بلوچستان جام کمال خان تون مروک آ اوڑدہی ٹی اودے پٹ فیڈر کینال اٹی دیر اناکاختی و زمیندار و کشارگرآتا مشکل آتا بابت آگاہی فراوان کننگا خریف نا سیزن اٹ دیر انا زیات کاختی نا سوب آن دسوک آ برنج نا پنیریک ہُشنگ انگ ءُ ہراڑآن زمیندار و کشارگرآتے کشت وکشار نا بشخ اٹی بھاز نسخان مننگ ءِ۔ ہراڑآ وزیراعلیٰ بلوچستان جام کمال خان باوری کرفے کہ داچرجوئی ٹی وزیراعلیٰ سندھ سید مراد علی شاہ تون اوار محکمہ آبپاشی نا بڑزکو کمامدارآتون رابطہ کرسا اودے بلوچستان نا جوتیٹی دیر انا کاختی آن آگاہی فراوان کرے، صوبائی وزیر ریونیو میر سلیم خان کھوسہ پارے کہ ننا اولیکو کوشست ءِ کہ بلوچستان اٹ پٹ فیڈر کینال تون اوار ایلوجوتے سندھ آن اونا بشخ انا دیر انا فراوانی مننگ کے ہراڑکن صوبائی حکومت تینا پبی کوشست ءِ کننگ ءِ، ہرحال اٹ تینا زمیندار و کشارگرآتے تنیا الیپنہ، کشاری دیر انا بابت اوفتا مشکل آتے ٹی کمتی اتنگ کن صوبائی حکومت سندھ حکومت تون رابطہ ٹی ءِ، پٹ فیڈر کینال و ایلو ذیلی شاخ تے ٹی دیر انا کاختی نا سوب آن نصیر آباد، صحبت پور اٹی کشاری بشخ بھاز زہمی مننگ ءِ وصحبت پور نا گڑاس علاقہ غاتے ٹی الس ءِ کنوئی آ دیر انا ویل ہم ودی مننگ ءِ، داوڑنا حالیت آک حقیقت اٹ ننکن فریشانی نا سوب ءُ نن تینا الس کن ہرپڑآ جہد کرسا کینہ و اوفتے تون پبی تفسا کینہ، ننا پورو کوشست ءِ کہ پٹ فیڈرکینال اٹ دیر انا کاختی نا ویل انا مون ءِ توننگ کن انتس کہ مننگ کرے گام گیج کننگے، مخلوق نا گیشتر نا گزربسر کشاری بشخ اتون وابستہ ءِ و کشاری نسخان تا مطلب مخلوق نا زرگزرانی بدحالی ءِ۔
