کوئٹہ۔ 19جولائی (اے پی پی) صوبائی دارالحکومت کوئٹہ تون اوار مچ آ بلوچستان اٹی بھلا عئید انا وخت آ سیکورٹی نا سخت بست وبند کننگانے۔ سرکاری حوالی نا رداٹ بھلاعئید انا وخت آ کوئٹہ تون اوار مچ آ صوبہ ٹی سیکورٹی نا سخت بست وبند کننگانے، پولیس نا ودکی بھلو نفری اسے تون قومی شاہراہ، داخلی وخارجی کسرتیا سنیپ چیکنگ نا چندی ناکہ جات ہم تعینات کننگانے، انسپکٹر جنرل آف پولیس بلوچستان محمد طاہر رائے نا جاری کروک خصوصی پرمان تیا بھلا عئید انا وخت آ پولیس سیکورٹی ءِ مون آ تخسا مچ آ صوبہ و کوئٹہ تون اوار عئید انا دا خوشی نا وخت آ ہرناخوشگوار واقعہ نا توننگ کن پولیس سیکورٹی نا سخت بست وبند کرینے، قومی شاہراہ تتون اوار علاقہ نا ہن و بر نا کسر و کوئٹہ نا چندی لنک شاہراہ تیا سنیپ چیکنگ کن پولیس نا ودکی بھلونفری اس و ناکہ تعینات کننگا۔ تعینات غٹ سنیپ چیکنگ ناکہ غاتا چاروکی نا عمل ءِ ہم پین گچین کننگانے۔ یات سلے کہ عئید سیکورٹی کن غٹ پولیس آفیسر و کارندہ غاتا چھٹی تے مہالوآن منسوخ کننگاسس۔ پولیس نا بڑزکوکمامدارآتا خاص پارت آ عئید سیکورٹی پلان اس ترتیب تننگانے جاری پرمان تیا دمدستی وڑاٹ عملدرآمد ءِ پک کننگانے۔ اومیڈیانا توسط اٹ شاری تے پارے کہ عئید اناوخت آ ہروڑنا شکبر گڑایا شکبر بندغ اسے خننگ آ دمدستی وڑاٹ پولیس نا 15مددگار سینٹر یا خڑک انا پولیس آفیسر یا کارندہ ءِ وخت آ اطلاع ترسا اسہ زموار شاری اس مننگ نا شاہدی ءِ ایتر۔
