نارتھ فری زون گوادر نا اولیکو زون آن 35ہنداخہ پین زیات بھلا انڈسٹریل زون ءِ، داٹی اسہ ارب ڈالر نا چینی زرکاری نا گمانی ءِ، پی ایس ڈی پی ٹی بلوچستان کن 1200ارب روپئی نا ڈٹ آک اوار ءُ، اسد عمر

گوادر۔ 06جولائی (اے پی پی) وزیر ڈٹ بندی، شونداری، اصلاحات و خصوصی گام گیج اسد عمر پارینے کہ نارتھ فری زون گوادر نا اولیکو زون آن 35ہنداخہ پین زیات بھلا انڈسٹریل زون ءِ، چینی زرکارآتا کنڈآن انڈسٹریل زون اٹی اسہ ارب ڈالر آن زیات نا زرکاری نا گمان ءِ، بنجائی حکومت نا سرکاری بشخ انا شونداری پروگرام اٹی بلوچستان کن کل 1200ارب نا ڈٹ آک اوار ءُ۔ داخیال آتا درشانی ءِ او گوادر اٹی میڈیا تون گپ وتران کرسا کرے۔ بنجائی وزیر اسد عمر پارے کہ نارتھ فری زون گوادر نا اولیکو زون انا مقابلہ ٹی 35ہنداخہ پین بھلا انڈسٹریل ءِ ہراٹی چینی زرکارآک پبی زرکاری کننگ نا عزم انا درشانی ءِ کرینو۔ اوپارے کہ گوادر اٹی اڈ ہلوک آ دود اٹی شریک زرکارآتا کنڈآن پاننگاکہ انڈسٹریل زون اٹی اسہ ارب ڈالر آن زیات نا زرکاری نا ڈٹ ءِ۔ اوپارے کہ وزیراعظم عمران خان نومبر 2020ء ٹی سویلی بلوچستان کن تاریخی پیکج نا پڑو ءِ کریسس و تینا دورہ گوادر نا وخت آ وزیراعظم پیکج آ پیش رفت نا جاچ ءِ ہلک۔ اسدعمر مستی پارے کہ بنجائی حکومت 600ارب روپئی آن زیات نا پیکج آن 53ڈٹ آتے داسال انا شونداری پروگرام اٹ اوار کرینے۔ اوپارے کہ حکومت نا کنڈآن ورناتے انٹرنیٹ نا پوسکن آ آسراتی فراوان کننگ انگ ءِ۔ بنجائی وزیر پارے کہ بنجائی حکومت نا سرکاری بشخ انا شونداری پروگرام (پی ایس ڈی پی) ٹی بلوچستان کن کل 1200ارب نا ڈٹ آک اوار ءُ۔ اوپارے کہ بلوچستان اٹی داکچ آ شونداری کاریم پاکستان نا تاریخ اٹ مہالو متنے۔ بنجائی حکومت صوبہ ٹی شونداری کاریم بلوچستان حکومت نا شریداری اٹ کننگ ءِ و وزیراعلیٰ جام کمال صوبہ نا شونداری کن کوشست کننگ ءِ۔ اوپارے کہ پاکستان تحریک انصاف نا حکومت وزیراعظم عمران خان نا کماشی ٹی ہراوڑشونداری ڈٹ آتیا چکارکننگ ءِ اونا مستین اٹ ہچ ءُ درور اس ملیپک۔ بنجائی وزیر ڈٹ بندی اسدعمر پارے کہ گوادر اٹی سی پیک ڈٹ آتے ٹی زرکاری کن چین وپاکستان غٹ زرکارآتے بخیر اٹ پانہ، چین روڈ اینڈ بیلٹ اینیشی ایٹیو نا رداٹ نئے بیرہ تینا ملک ءِ شونداری بلکن ڈیہہ نا ایلو ملک آتا شونداری و شونہالی خواہک۔ اوپارے کہ پاکستان و چین نا کمکاری ہمہ جہت و تاریخ نا پوسکن آ بڑزی تیا ٹی ءِ۔ اسدعمرپارے کہ نارتھ ساؤتھ مواصلاتی رابطہ غان نئے بیرہ گوادر بلکن نیامی ایشیائی ریاست آتون رابطہ نا ذریعہ مریک۔ داچین نا کمک اٹ ہی مننگ کرینے، داڑآ نن چین نا حکومت نا منت وار اُن، چین و پاکستان ہڑتوم آ تا دا موقف ءِ کہ گوادر اٹ سی پیک نا ڈٹ آتے ٹی ہرکس کہ زرکاری کن برے تو اودے بخیر اٹ پاننگک۔ اوپارے کہ شی جن پنگ نا روڈ اینڈ بیلٹ اینیشی ایٹیو جہانی رابطہ کن ءِ و داٹی ہچ وڑنا پرخ اس اف، چین نئے بیرہ تینا شونداری بلکن ایلو دنیاناہم شونداری ءِ خواہک و او نئے بیرہ تینا مخلوق بلکن مچ آ ڈیہہ نا مخلوق ءِ نیزگاری آن کشنگ خواہک۔