لاہور۔ 06جولائی (اے پی پی) خصوصی کمکار وزیراعلیٰ پنجاب ڈاکٹر فردوس عاشق اعوان پارینے کہ ہراڑے باسنی نا شدت اٹ ودکی مننگ ءِ، ہموڑے نادان اپوزیشن سیاسی درجہ حرارت ءِ سوات کون آ پرآسائش و خوشگوار موسم اٹ یکجا مرسا چس ہلنگ ءِ۔ کنیز اول جھولا کنسا نظر بسنے ہراپاش کیک کہ اوفتے الس نا اخس درد ارے و دا الس نا ویل آتا ایسری کن اخہ در کوشست کننگ ءُ۔ الس نا حق آ واتوڑ کروک آ رڑ الس ءِ ریفنگ ءِ۔ شاہدخاقان عباسی شہباز شریف نا بیانیہ ءِ داغدار کرسا نظر بسنے۔ شہباز شریف جعلی راجکماری نا کشمیر نا الیکشن ءِ لیڈکننگ نا تغ ءِ چور چورکرینے ہراپاش کیک کہ اوفتا اُراٹی بے چیٹی و پھسات ءِ۔ پی ڈی ایم ملک اٹی ہم ہنداوڑ بے چیٹی و پھسات کننگ خواہک۔ داخیال آتا درشانی ءِ خصوصی کمکار ڈی جی پی آر اٹی میڈیا تون گپ وتران کرسا کرے۔ اوپارے کہ بھلو گیشتری اسے اٹ بجٹ نا منظوری آ حکومت نا دوتے اٹ اپوزیشن ءِ ہراہزیمت ہرفوئی تما، سوات نا جلسہ ٹی اپوزیشن تینا ٹھپ آتے چٹنگ اٹ اختہ ءِ۔ وزیراعلیٰ نا برخلاف کنیز دوم منفی پروپیگنڈا بمب آنبار میڈیا غا سکرین آ ہلک و دا تاثر ایتک کہ اوفتا بیانیہ راستکی تیا مبنی ءِ وخت اس کہ حقیقت داڑآن چپ ءِ۔ خصوصی کمکار پارے کہ عثمان بزدار مسہ سال آن اپوزیشن نا خن تیٹی سُرنگ ءِ۔ وزیراعظم عمران خان پدسلوک آ علاقہ غان وزیراعلیٰ ءِ گچین کرسا اودے نمائندگی نا موقع تس وخت اس کہ شاہی خاہوت تو کس اسے اقتدار اٹی بننگ نا موقع تتور۔ وزیراعلیٰ عثمان بزدار مسہ سال آن ن لیگ نا مقابلہ ءِ کننگ ءِ و ادارہ غاتے لگوک آ دیمک نا چٹفنگ کن متاماری کننگ ءِ۔ اوپارے کہ پاکستان تحریک انصاف نا حکومت شونداری نا ہرا روڈ میپ اس ایسونے او ظلِ سبحانی نا مزاج نا رداٹ اف انتئے کہ داسہ بیرہ الس نا دادرسی مریک۔ ورناتے آب اٹ تعلیم، گچین طبی آسراتی تا فراوانی و روزگار نا وارخواہی حکومت نا اولیت آتے ٹی اوار ءِ۔ وزیراعلیٰ عثمان بزدار ساڑی آ دور انا گرج آتے مون آ تخسا ای روزگار اسکیم ءِ درستی راستی کرفے۔ ای روزگار پروگرام پنجاب نا بے روزگار ورناتے فری لانسنگ نا تربیت فراوان کننگ ءِ ہراڑآن او اُراٹی تولوک آن لائن کاریم کرسا زرمبادلہ کٹنگ ءُ۔ ای روزگار پروگرام محکمہ یوتھ افیئرز و پنجاب انفارمیشن ٹیکنالوجی بورڈ انا شریداری اٹ بناکننگانے۔ خصوصی کمکار پارے کہ پنجاب اٹی 71ہزار بندغ ءِ فری لانسنگ نا تربیت فراوان کننگانے و 45ہیلکاری ہند آتا جوڑ کننگ دا ڈٹ انا بروک آ ہدف آتے ٹی اوار ءِ۔ داتم اسکان 31ہزار آن زیات اومیتدار آتے تربیت تننگانے۔ دافتے ٹی زالبول آتا کچ 54درسد ءِ۔ پین 4ہزار بندغ زیرتربیت ءُ۔ ڈاکٹر فردوس عاشق اعوان پارے کہ ای روزگار پروگرام اٹی 3تُوانا مفت تربیت تننگک۔
