برسلز۔ 11جون (اے پی پی) پاکستان نا سفارت خانہ، برسلز سٹیٹ بینک آف پاکستان و میزان بینک لمیٹڈ نا شریداری اٹ اینو”روشن ڈیجیٹل اکاؤنٹ“ (آرڈی اے) شرعی زرکاری و مالی وارخواہی تا بارواٹ اسہ ویبنار اسے نا بست وبند ءِ کریر۔ ویبنارآن بیلجیم، لکسمبرگ یوروپی یونین اٹ پاکستان نا سفیر ظہیر اے جنجوعہ، بانی صدر و سی ای او میزان بینک، عرفان صدیقی، و اسٹیٹ بینک انا منیجنگ ڈائریکٹر سید عرفان علی ئسک تران کریر۔ داوخت آ گپ وتران کرسا، سفیر ظہیر جنجوعہ آرڈی اے ءِ حکومت نا پوسکن آ گام گیج گوندا، ہراپاکستانی باتی تے پاکستان اٹ تینا دوست آتے زر گدریفنگ اٹ کمک فراوان کرینے و بینکنگ خذمت فراوان کرسا ڈیجیٹل زرتس نا نظام اٹ آسانی ودی کرینے۔ اوپارے کہ اینخو مالی سال (جولائی آن اپریل) نا اولیکو 10تُواٹی، بیلجیم و لکسمبرگ آن ترسیلات زر اٹی 270 درسد ودکی مسنے ہراکہ 202.6ملین امریکی ڈالر ءُ ہراتدوک آ مالی سال انا ہنداوخت اٹی 54.8ملین امریکی ڈالرئس۔ سفیر ترسیلات زر نا بہاؤٹی ریکارڈ ودکی آ پاکستانی کمیونٹی نا منت واری ءِ ہرفے و اومیت ظاہرکرے کہ دارجحان آخبت ہم برجاسلک۔ سفیر زورشاغسا پارے کہ دارجحان حکومت نا زرگزرانی پالیسی تیٹی پیشن نا ملک رہینگوک آ پاکستانی تا پت انا درشانی ءِ۔ میزان بینک بانی صدر و سی ای او عرفان صدیقی داگام گیج نا رداٹ صارف آتے بھلو کچ اسے آ فائدہ غاتا بارواٹ ہیت کرے۔ منیجنگ ڈائریکٹر اسٹیٹ بینک، سید عرفان علی ہم آرڈی اے نا اہم خصوصیات و فائدہ غاتا بارواٹ سرجم آتے بیان کرے۔ ورچوئل انٹرایکشن اٹ بیلجیم و لکسمبرگ اٹ رہینگوک آ پاکستانی باتیک بھلو کچ اسے ٹی بشخ ہلکر۔ ہراٹی بینکر، مالیاتی چاہندار، کاروباری بندغ، طالب علم و میڈیااوار ئسر۔ بشخ ہلوک آک شرہ ٹی فعال وڑاٹ بشخ ہلکر، اسکیم نا بارواٹ سوج کرے و داگام گیج نا ستاءِ کرے۔ وزیراعظم عمران خان لکھ آ غیر مقیم پاکستانی تے بینکاری نا پوسکن ایسر فراوان کننگ کن، ستمبر 2020ٹی روشن ڈیجیٹل اکاؤنٹ اسکیم نا بناءِ کریسس۔ تدوک آ ستمبر اٹ داآسراتی نا بناآن پد آن، اسہ ارب امریکی ڈالر آن زیات ترسیلات زر خننگانے۔
