نیویارک۔20 مئی (اے پی پی) وزیر خارجہ مخدوم شاہ محمود قریشی پارینے کہ فلسطین اٹی انسانی المیہ نا توننگ کن اسیجائی کوشست آتے کاریم اٹ اتنگ نا گرج ءِ۔ او تدوک آ دے فلسطین نا بابت اڈ ہلوک، اقوام متحدہ نا جنرل اسمبلی نا ہلہلہ ئی دیوان اٹی بشخ ہلنگ کن بروک آ وزیر خارجہ غاتا شرف اٹی سوارہ غان تران کریکہ۔ سوارہ نا بست وبند ءِ نیویارک اٹی واقع پاکستانی سفارت خانہ ٹی کننگا۔ سوارہ ٹی ترکی، فلسطین، تیونس نا وزیر خارجہ غاتیان بیدس صدر جنرل اسمبلی وولکر بوزکیر و او آئی سی ملک آتا اقوام متحدہ ٹی آخبتی مندوب آک بشخ ہلکر۔ وزیر خارجہ مخدوم شاہ محمود قریشی شرفدار آ مہمان تے پاکستانی سفارت خانہ غا بننگ آ بخیر اٹ پارے۔ وزیر خارجہ تینا بیابخیری تران اٹی کودک فلسطینی تیا کروک آ بربریت، انسانی حق انا بھلا خلا ف ورزی و امن و ایمنی ءِ مون تروک خطرہ غاتا حوالہ ءِ ترسا، داپوسکن آ انسانی المیہ نا توننگ کن اسیجائی کوشست آتے کاریم اٹ اتنگ نا گرج آ زور شاغا۔ وزیر خارجہ شرفدار آ مہمان تے فلسطین اٹی امن نا بابت پاکستان نا کنڈآن کاریم اٹ اتوک آ سفارتی کوشست آتیان معلومدار کرے۔ وزیر خارجہ، اقوام متحدہ، جنرل اسمبلی نا ہلہلہ ئی دیون اٹی، اسیجائی لائحہ عمل اختیار کننگ و جہانی برادری نا چکار ءِ فلسطین نا تکلیف دہ حالیت آتا کنڈآ کرفنگ کن سرجم سلابت ہم کرے۔ اقوام متحدہ ٹی پاکستان نا آخبتی مندوب منیر اکرم و امریکہ ٹی تعینات پاکستان نا سفیر اسد مجید خان ہم داوخت آ ساڑی ئس۔
