نئی دہلی۔ 20 مئی (اے پی پی) بھارت تدوک آ 24 گھنٹہ ٹی اسہ دے اٹی ہلوک آ کورونا دین آن غٹ آن زیات زوال کروک آتا جہانی ریکارڈ اس جوڑ کرینے۔ تدوک آدے ملک اٹی 4529بندغ ءِ کورونا دین کُنگ۔ کشمیر میڈیا سروس نا رداٹ داکان مست اینخو سال 12 جنوری آ امریکہ ٹی ہلوک آ دین آن اسہ دے اٹی غٹ آن زیات 4425مرک مسوسس۔ بھارتی وزارت جان جوڑی نا حساب وکتاب نا رداٹ چارشنبے نادے آ کورونا دین آن 4529بندغ مرک کریر۔ ہراڑآن بھارت اٹی ہلوک آ دین آن زوال کروک آتا جم کچ ودسا 2 لکھ 83 ہزار 248مسنے وخت اس کہ ملک اٹی 2 لکھ 67 ہزار 334 پوسکن ءُ کیس پک مسنے۔ ہراڑآن زہمی بندغ آتا کچ 2 کروڑ 54 لکھ 96 ہزار 330 مس۔ بھارت ٹی کورونا دین انا مثبت کیس آتا کچ کم مرسا 12.66درسد مسنے، وخت اس کہ مرک آتا کچ داسہ ہم 1.11 درسد ءِ۔ ایڑے چاہندارآتاپاننگ ءِ کہ بھارت اٹی کورونا دین انا پوسکن آ ریسہ ہراترندی اٹ تالان مسکہ آخرکار سست مننگ ءِ۔ ولے اوپارے کہ ہلوک آ دین انا سوب آن مرک آتے ٹی پدریسہ ودکی مننگ ءِ و ہسپتال آتے ٹی داسہ ہم ناجوڑآتا رش ءِ۔ تدوک آ تُو بھارت اٹی کورونا دین آن مرک آتے ٹی شش ہنداخہ پین ودکی مسوسس۔ دُن تو ساڑی آ دے تیٹی ممبئی و نئی دہلی کون آ بھلا شار تے ٹی مرض انا تالانی ٹی کمتی بننگ ءِ ولے دین خلقی آ علاقہ غاتے ٹی ترندی اٹ تالان مننگ ءِ ہراڑے مخلوق نا گیشتر رہینگ انگ ءُ و ہموڑے جان جوڑی نا آسراتی و ٹیسٹ کرفنگ نا آسراتی کچ اٹ ءِ۔ بھارتی ریاست اترپردیش نا حالیت آک بھاز نازرک ءُ ہرانا آبادی بیست کروڑ ءِ۔ اترپردیش نا اسہ عدالت اس پارینے کہ حکومت الس ءِ حالیت آتا رحم و کرم آ ہلانے۔ ریاست اٹ کورونا نا مثبت ناجوڑ آتا کچ اسہ لکھ 36 ہزار ءِ۔ جان جوڑی نا چاہندار آتا پاننگ ءِ کہ بے پورو حساب وکتاب آن بیدس ہلوک آ دین آن زہمی بندغ آتا درست کچ انا کساس ءِ خلنگ مشکل ءِ۔ بھارتی ریاضی دان مراد بنجی پارینے کہ ملک انا خلقی آ علاقہ غاتے ٹی کورونا دین انا تالانی نا بارواٹ ہچ ءُ حساب وکتاب اس دوئی اف۔ اترپردیش نا چندی بشخ آتے ٹی مخلوق کورونا دین انا ٹیسٹ کرفنگ آن مست اِل و دم سلنگ نا سوب آن زوال کننگ ءُ۔ نرینہ غاتے ہُشنگ کن پاٹک چٹانو و سد آ لاش آتے دریائے گنگا ٹی بٹنگانے۔ ریاست ناضلع بانڈا ٹی دین انا بارواٹ مخلوق اٹ شعور بیدار کننگ کن کاریم کروک آ این جی او ودیا دھم سمیتی نا راجہ بھیا پارینے کہ خلقی اکثر اِل و جون نا دڑد ءِ گوجالرہ۔ داکان مست ءِ اوفتے سماتمے کہ ناجوڑ ءِ انت مسنے اونا مرک واقع مریک۔ اوپارے کہ خلق اٹ مرک انا اسٹ انگا شاہدی زالبول و چناتا چیہانٹ و واتوڑ ءِ ہراداسہ دم دم آ بِننگ انگ ءِ۔
