اٹاوا۔ 09 مارچ (اے پی پی) کینیڈا ٹی پاکستان نا ہائی کمشنر رضابشیر تارڑ پارینے کہ تعلیم نسواں کن کامن ویلتھ آف لرننگ نا کوشست آتا سوب آن خلقی آ علاقہ غاتیٹی زوراکی و چنک سنی ٹی برام تا حوصلہ شکنی مسنے و راج اٹ زالکار نا کڑد اٹ ودکی مسنے۔ داخیال آتا درشانی ءِ او اٹاوا ٹی زالکارآتا جہانی دے انا بابت بڑزکو کہولی شرہ غان تران کرسا کرے۔ کینیڈین حکومت نا کنڈآن زالبول آتا جہانی دے انا وخت آ دولت مشترکہ نا ہیڈز آف مشنز و کامن ویلتھ آف لرننگ تون اسہ بڑزکو کہولی ورچوئل شرہ اس اڈتننگا۔ شرہ ٹی کینیڈا نا وزیر خارجہ مارک گارنیوو کینیڈا ٹی کامن ویلتھ آف لرننگ نا صدر پروفیسر آشاکنور ئسک ہم ساڑی ئسر۔ تینا تران اٹی ہائی کمشنر رضابشیرتارڑ بشخ ہلوک آتے پاکستان اٹ تعلیم نسواں نا مون آ دننگ کن کامن ویلتھ آف لرننگ نا کوشست خاص وڑاٹ سوات اٹ آف لائن ورچوئل کلاس روم آزموندہ نا سرسہبی آن معلومدار کرے۔ رضابشیر تارڑ پارے کہ پاکستان نا بیست کروڑ آبادی نا شست درسد بشخ ورناتیا تالانءِ ہرافتے تعلیم نا زیور آن شپ کننگ کن حکومت پاکستان غٹ وسیلہ غاتے کاریم اٹ اتنگ ءِ ولے دا بابت کامن ویلتھ آف لرننگ نا کڑد سفت نا قابل ءِ ہرادولت مشترکہ نا ملک آتیٹی گرلز انسپائرانشی ایٹیو نا کمک اٹ زالبول آتے تعلیم نا زیور آن شپ کننگ و اوفتے روزگار نا دوئی کننگ کن پوسکن ءُ کسب آن شپ کننگ کن نمان کاریم کرینے۔ اوپارے کہ تعلیم نسواں کن کامن ویلتھ آف لرننگ نا کوشست آتا سوب خلقی علاقہ غاتیٹی زوراکی و چنک سنی ٹی برام تا رجحان نا حوصلہ شکنی مسنے و راج اٹ زوالبول آتا کڑد اٹ ودکی مسنے۔ اوکامن ویلتھ آف لرننگ نا کوشست آتیان سوات اٹ آف لائن ورچوئل کلاس روم نا سرسہب آزموندہ غان ہم بشخ ہلوک آتے معلومدار کرے۔
