اسلام آباد۔ 12مئی (اے پی پی) صدر مملکت ممنون حسین 2”سولر چنا“تے گچین طبی آسراتی فراوان کننگ ناپارت کرسا دا ہیت آ زورشاغانے کہ دا ناجوڑی نا تشخیص و اونا درمان تجویز کننگ کن جامع پٹ وپول کننگے۔ اوداہیت ئِ پنچ شنبے آ بلوچستان آن تعلق تخوک آ زہمی چنا(سولر چنا) شعیب احمد و عبدالرشید تون ہیت وگپ کرسا پارے ہراک ایوان صدر اٹی تینا باوہ غاتون اوار اوڑتون اوڑدہی کریر۔ وزیر مملکت کیڈ ڈاکٹر طارق فضل چوہدری ، سیکرٹری کیڈحسن اقبال و شہید ذوالفقار علی بھٹو میڈیکل یونیورسٹی نا وائس چانسلر پروفیسر جاوید اکرم ہم داوخت آ ساڑی ئسر ۔ صدر مملکت خصوصی جوزہ نا رداٹ ہڑتوم آ چناتا ایوان صدر اٹی خیر مقدم ئِ کرے و بے کچ شفقت تون اوفتا جان جوڑی نا بارواٹ ہریفے۔ صدر ہڑتوم آ چناتون مشفقانہ اندازاٹی ہیت و گپ کرے و اوفتے ٹیکی تس۔ صدر اومیت ظاہر کرے کہ او بھاز زوت پورو جان جوڑ مریرہ و معمول نازندئِ تدیفرہ۔ داوخت آ وزیر مملکت کیڈ صدر مملکت ئِ ہڑتوم آ چناتا حالیت و پاکستان انسٹی ٹیوٹ آف میڈیکل سائنسز(پمز) اسلام آباد اٹی اوفتا درمان نا بارواٹی معلومدار کرے۔ صدر پارت کرے کہ چناتا پبی خیال ئِ تخنگے و داہیت آ زورشاغاکہ پاکستانی ڈاکٹر آتے دا ناجوڑی نا پورو پٹ وپول و اونا اسباب آتا پیدواریئِ کرسا اونا گچین درمان اس تجویز کروئی مرے۔ صدر داہیت آ است جمی نا درشانی ئِ کرے کہ پمز انا ڈاکٹرز ہڑتوم آ چناتا درمان کن تینا پبی کوشست آتے کاریم اٹ اتنگ ئُ۔ او صلاح تس کہ شون ہلوک ملک آتا طبی ادارہ غاتیان ہم دارداٹ صلابت کننگے تانکہ دا ناجوڑی نا بارواٹی ٹھوس نتیجہ دوئی کننگ مرے۔
