اسلام آباد۔ 12مئی (اے پی پی) صدر مملکت ممنون حسین پارینے کہ حکومت اقتصادی بحالی کن کوشست آتون اوار اوار ماس ٹرانزٹ سسٹم و جان جوڑی و تعلیم نا بشخ آتون اوار السی شرحالی ڈٹ آتیا توجوہ تخنگئِ۔ اوداہیت ئِ تدوک آنن ایوان صدر اٹی لاہور چیمبر آف کامرس اینڈ انڈسٹری اچیومنٹ ایوارڈز نا بشخ و پانٹ نا دود آن تران کرسا پارے۔ اوپارے کہ لاہور و اسلام آباد اٹی میٹروبس سروس نا پوروی آن گڈ ملتان و کراچی ٹی ہم پوسکن آ ماس ٹرانزٹ ڈٹ آتیا کاریم جاری ئِ۔ صدر پارے کہ حکومت نا دانشمندانہ اقتصادی پالیسی تا بدولت ملک اٹی حالیت آک گچین مننگ ئُ ، بروک آ دے تیٹی اوٹی پین گچینی بریک۔ صدر پارے کہ پاک چین اقتصادی راہداری نا فعال مننگ آن پاکستان اٹی وسیع تر درملکی زرکاری و کاروباری سرجزآتے سوگوی رسینگک۔ اوپارے کہ مسکوہی ٹی دہشت گردی و امن وایمنی نا حالیت پیشن نا زرکاری و کاروباری سرجزآتے ٹی بھلو اڑاند اس مسنے ولے داسا قومی لائحہ عمل نا رداٹ چست کروک آ گام گیج آتا بناءدہشت گرد آتا مخ پنانے۔ صدر ممنون حسین پارے کہ گچین حالیت و حکومت ناآزادانہ پالیسی تا سوب کیہی دوست ملک آتون زرکارپاکستانی کمپنی و کاروباری ادارہ غاتون اسیجائی ڈٹ شروع کننگ اٹی است خواہی تخرہ۔ اوپارے کہ پاکستانی کاروباری شخصیت آتے دا حالیت آتیان استفادہ کروئی مرے و نیامی ایشیاء، افریقہ ، دے ٹک بعید و لاطینی امریکہ ٹی پوسکن ئُ منڈی پٹوئی مرے، دنکہ او ڈیہہ تا حکومت آک و نجی بشخ آک پاکستان تون وسیع تر کاروباری رابطہ غاتا خواہندارئُ۔ صدر پارے کہ حکومت ہم دا رداٹ اسہ جامع پالیسی اس وضع کننگ ئِ۔ صنعت کار و برآمد کنندگان آتے اوڑآن استفادہ کروئی مرے۔ اوپارے کہ برآمدات آتے ٹی ودکی ٹی بجلی نا کاختی ہم اسہ بھلو اڑاند اس ئس ولے حکومت دا چیلنج آن ہم حد اسسکان مون تننگ اٹی سرسہب مسنے ہراکہ اسہ بھاز بھلو سرسہبی اسے۔ صدر نجی بشخ آ زورشاغا کہ او بجلی نا بنداوی ڈھانچہ نا ڈٹ آتیٹی زرکاری کیر تانکہ بجلی نا ترسیل ئِ مچ آ ملک اٹی باوری جوڑ کننگ مرے۔ اوای سی سی آئی اچیومنٹ ایوارڈ 2016ءہلوک آتے مبارکباد تریسہ ملکی معیشت اٹی لاہور نا کاروباری بندغ آتا گچین کڑداانا صفت ئِ کرے۔ داوخت آ صدر لاہور آن گچین مروک آ کاروباری بندغ آتے ٹی اچیومنٹ ایوارڈز ہم بشخ و پانٹ کرے ۔ لاہور چیمبر نا صدر محمد ارشد و سینئر نائب صدر الماس حیدر ہم دود آن تران کریر۔
