اسلام آباد۔ 11مئی (اے پی پی) وزیراعظم نا سلاہکار قومی تاریخ و ادبی میرات عرفان صدیقی پارینے کہ بانی پاکستان قائد اعظم محمد علی جناح نا مزا ر قومی اتحادو یکجہتی نا علامت ئِ، حکومت اونا خیالداری و زیب و زیبائی و پبی توجوہ تننگ ئِ۔ دوست ملک چین قائد نا مزار کن کروڑآ روپئی تا خڑچ آن تیار مروک آ بے کچ دیدہ زیب فانوس اس ٹیکی اٹ تسنے ہرادے اینخو نا سال اگست نا تو اٹی متکن آ فانوس نا جاگہ غا خلنگک۔ او چارشنبے آ وزارت خارجہ ٹی ’قدیم پاکستان“ نا سرحال آن اڈ ہلوک آ مسہ دے ئی نمائش نا ایسری دود آن تران کریکہ۔ داوخت آ سیکرٹری خارجہ اعزاز احمد چوہدری، آثار قدیمہ و نوادرات آتیان بابت چائندار ، جتا عجائب اُراتیا ن تعلق تخوک آ زمہ واران ، کاریگر، فنکار، نیشنل کالج آف آرٹس انا طالب علم و وزارت خارجہ نا افسرآک ساڑی ئسر۔ وزیراعظم نا سلاہکار عرفان صدیقی پارے کہ قائد نا مزار قومی اتحاد و یکجہتی نا علامت ئِ ، اونا خیالداری و زیب و زیبائی ننا اولین اولیت ئِ، ہراڑآ حکومت پبی توجوہ تننگ ئِ۔ وزیراعظم محمد نواز شریف دننگا غٹ ہند ، تہذیبی و تاریخی میرات آتا اہمیت نا بناءآ اسہ جتائُ ڈویژن اس قومی تاریخ و ادبی میرات اس جوڑ کرے ہرانا زمہ واری تے ٹی قائد نا مزار نا خیالداری آن بابت معاملہ غاک ہم اوارو۔ اوپارے کہ مست ہم چین ہی قائد نا مزار کن فانوس اس ٹیکی اٹ تسوسس و داسا نن ہراتم اونا زیبائی ، جوڑجاڑ و آرائش نا جاچ ئِ ہلکن تو اسہ وار ولدا چین نا کنڈآن پوسکن ئُ فانوس اس بطور ٹیکی تننگ نا پیش کش مس۔ ہرانا تیاری آ 32کروڑ روپئی آن زیات خڑچ بسنے۔ مچ آ قوم چین نا دوجوزہ ئِ خیر سگالی ئِ شرف و مابت نا نظر اٹ ہرک و دا ٹیکی آ اہل پاکستان چین نا منت وار ئِ۔ اونمائش نا بست وبند ئِ کروک آ ٹیم ئِ شاباشی تس و اوفتا جوزہ نا ستائِ کرے۔ اوکان مست سلاہکار وزیراعظم نمائش اٹی تخوک آ نوادرات ، آثارقدیمہ و مخطوطات آتا معائنہ ئِ کرے۔ داوخت آ او کیہی بندغ آتے ٹی صفتی شیلڈہم بشخ وپانٹ کرے۔ سیکرٹری خارجہ اعزاز احمد چوہدری سلاہکار وزیراعظم ئِ یات گاری شیلڈ و وزارت خارجہ نا کنڈآن آثارقدیمہ آن بابت تیار کروک آ رپورٹ ئِ ہم پیش کرے۔
