اسلام آباد۔ 28 فروری (اے پی پی) ترجمان دفتر خارجہ ڈاکٹر محمد فیصل اسہ وار ولدا پیدوار کرینے کہ پاکستان دہشت گردی تون اوار غٹ ایسر نا چاری معاملہ غاتیا بھارت تون ہیت وگپ کن تیار ءِ، کشمیر ہڑتوم آ ملک آتا نیام اٹ بنداوی جھیڑہ ءِ، پاکستان داڑان وخت اس ہم پدی مفک۔ دہشت گردی نا بہانہ غا ٹھوس شاہدی آن بیدس داوڑنا دراندازی مچ آ ڈیہہ ءِ بھس کاری آن دوچار کننگ کیک، پاکستان تینا دفاع کن ہچ کس نا کنڈا ہُپک ، ننے سلہہ بند فوج و الس آ پورو پت ءِ، بے چیٹی تے کم کننگ کن بھارتی سلہ نا ستا ءِ کینہ، سمجھوتہ ایکسپریس ءِ سیکورٹی سوب آتا بناآ تورینن۔ پلوامہ جلہو نا بابت بھارت ڈوزیئرز پاکستان نا حوالہ کرینے۔ پنچ شنبے نادے آ ہفتہ وار بریفنگ اٹی گپ و تران کرسا ترجمان پارے کہ پلوامہ جلہو نا بابت دستاویز آتے پاکستان نا حوالہ کرینے۔ دستاویز آتا جاچ ءِ ہلنگ اُن۔ ٹھوس شاہدی آ پاکستان پبی کمک کیک۔ پاکستان بے چیٹی خواپک، بھارت تون دہشت گردی تون اوار غٹ ایسر نا چاری معاملہ غاتیا مذاکرات کن تیار ءِ ولے کشمیر ہڑتوم آ لک آتا نیام اٹ بنداوی جھیڑہ ءِ۔ پاکستان داڑان وخت اس ہم پدی مفک۔ اسہ سوج اسے نا ورندی ٹی ترجمان پارے کہ بھارت نا اسہ پائلٹ اس ننتون رکھوک و گچین حالیت اٹی ءِ۔ پائلٹ ءِ جنگی بندی نا درجہ تننگ نابارواٹ زوت فیصلہ کننگک۔ ترجمان پیدوار کرے کہ پاکستان ہچ گہس تون بے چیٹی خواپک، نن ہیت وگپ کن مہالو ہم تیار ئسن داسہ ہم تیار اُن ولے بھارت مذاکرات آن نرنگ نا کسر ءِ اختیار کننگ ءِ۔ ننا امن نا است خواہی ءِ نزوری تکنگپ، ننے آ جنگ ءِ مسلط کننگا و نن پبی ورندی تسن۔ اسہ سوج اسے نا ورندی ءِ ترسا ترجمان پارے کہ نن پاکستان و بھارت کن یو این فوجی مبصر پڑک تون رابطہ کرینن و زوت پڑک ءِ دا جاگہ نا دورہ ءِ کرفنگک ہراڑے بھارتی جنگی جہاز ءِ خلسا بِٹنگانے۔ بھارتی جارحیت نا بابت چندی ملک آتا کنڈآن جاری بیان تا بابت اسہ سوج اسے نا ورندی ءِ ترسا ترجمان پارے کہ نن جہانی برادری ءِ باور کرفینن کہ اگہ دہشت گرد ٹھکانہ غاتا برخلاف کارروائی کننگ مسخت ہم مرے تو جہانی کانود علاقائی جارحیت نا موکل تفک۔ ترجمان پارے کہ دہشت گردی نا بہانہ ٹھوس شاہدی آن بیدس داوڑنا جلہو ڈیہہ ءِ بھس کاری آن دوچار کننگ کیک۔ ترجمان پارے کہ داسہ تو تینٹ بھارت نا تہہ آن توار بننگ ءِ کہ نریندر مودی نا پالیسیک ڈیہہ ءِ نزوری و بھس کاری آن دوچار کننگ کیک۔او آئی سی دیوان نا بابت ترجمان پارے کہ وزیر خارجہ شاہ محمود قریشی پیدوار کرینے کہ بھارتی وزیر خارجہ سشما سوراج ابوظہبی ٹی او آئی سی وزراء خارجہ کانفرنس اٹی بشخ ہلک تو او دیوان اٹی بشخ ہلپک۔