اسلام آباد ۔ 27 ستمبر (اے پی پی) بنجاھی دارالحکومت ءَ کپ ءُ چنڈیں لونس آنی مریض آںی واستہ یک ھاسیں نادراھ جاھ ءِ زوت جوڑ کنگ بیت۔ اسلام آباد ءَ کپ ءُ چنڈیں لونس آنی ایسوسی ایشن (آئی سی ایل پی اے) ہسپتال ءِ جوڑ کنگ ءَ انت۔ ایسوسی ایشن ءِ کارندہ آں گوشت کہ ہسپتال ءَ گریبیں مریض آناں مپت ءَ علاج ءِ آسراتی دیگ بیت۔ آئی ءَ گوشت کہ ہسپتال ءِجوڑیشت ءِ واستہ زمین پیسر ءَ چہ بھا زوگ بوتگ ءُ سیر لاپیں مردم ہسپتال ءِ جوڑیشت ءَ گیشاں چہ گیش بھر مان بکن انت۔ ایسوسی ایشن ءِ صدر ایم آفتاب ءَ ہسپتال ءِ جوڑیشت ءِ ھوالگ ءَ میڈیا ءَ را بریفنگ دیان ءَ گوشت کہ ہسپتال ءَ زھگ آںی نادراھی ءَ ابید دوا ءُ درمان ءِ ایندگر آسراتی ھم بیت گون۔ آئیءَ گوشت کہ ایسوسی ایشن سیر لاپیں مردم آنی کمک ءَ چہ 2004 ءَ بگر تاں انوگ ءَ گریبیں مردم آنی دوا ءُ درمان ءَ مپت ءَ کنگ ءَ انت ءُ اے ھوالگ ءَ سرجمیں سال ءَ ملک ءِ جتا جتائیں دمگ آنی تہ ءَ ھاسیں کیمپ برجم دارگ بیت ءُ کپ ءُ چُنڈیں لونس ءِ مریض آنی آپریشن ھم کنگ بیت انت۔ آئیءَ گوشت کہ ایسوسی ایشن ءَ را بازیں جیڈھ آنی گوما دیم پہ دیمی انت اے رد ءَ والنٹری کار کنوکیں مردم آنی کمی ءِ جیڈھ ھم است انت۔ آئی ءَ گوشت کہ آئی سی ایل پی اے والنٹری کار کنوکیں یک گروپ ات ایشی ءَ چاگرد ءِ گریبیں تبک ءِ زندمان ءِ تہ ءَ وشھالی آرگ ءِ واستہ وتی ازمت آناں ندر کتگ۔ آئی ءَ گوشت کہ پاکستان ءَ کساس ھمک سال دھ ہزار زھگ آناں جتا جتائیں کریٹیکل وڑ ءُ پیم ءَ ودی بنت ءُ انوگ ءَ تاں کساس دو لکھ زھگ علاج ءُ جرائی ءِ وداریگ انت۔ ایم آفتاب ءَ گوشت کہ ہسپتال ءِ جوڑیشت ءِ کار زوت بندات کنگ بیت ءُ اے ھوالگ ءَ یک ھاسیں کمیٹی ءِ جوڑ کنگ بوتگ۔ آئی ءَ گوشت کہ ایسوسی ایشن زھگ آناں جتا جتائیں نادراھی آں چہ رکھینگ ءِ واستہ الس ءِ اندر ءَ سرپدی ءِ بابت ءَ ھم گامگیج کنگ ءَ انت۔