اسلام آباد ۔ 10 جولائی (اے پی پی) مزن وزیر عمرا ن خان ءَ گوشت کہ کورونا ءِ گوما مڈگ ءِ ارش پاکستان ءِ واستہ ٹوھیں جیڈھ ات ، حکومت مد گ ءِ گر ءُ دار ءِ واستہ ھمک رنگیں گامگیج کنت انت، مدگ ءِ گر ءُ دار ءِ واستہ بنجاھی ءُ صوبائی حکومت ءُ ادارگ آناں گیش مھکمیں کوشست کنگ لوٹ ایت۔ اے ھیالانی درشانی آئی ءَ آدینگ ءِ روچ ءَ نیشنل لوکسٹ کنٹرول (این ایل سی سی) ءِ تر ءُ تاب ءِ ساھت ءَ کت۔ مزن وزیر ءَ اے موہ ءِ سر ءَ مدگ ءِ گر ءُ دار ءِ واستہ کتگیں گامگیج آنی بابت ءَ بریفنگ دیگ بوت۔ اے ساھت ءَ بنجاھی وزیر وردن ءُ وراک ءِ رکھینگ ، سید فخر امام ، بنجاھی وزیر منصوبگ بندی ءُ دیرموئی اسد عمر ، بنجاھی وزیر اھوالکاری ءُ شنگ کاری سینیٹر شبلی فراز، بنجاھی وزیر خسرو بختیار، مشیر ءِ ھزانگ ڈاکٹر عبداالحفیظ شیخ، سلاھ بنددیں ارد آنی سروک جنرل قمر جاوید باجوہ، مزن وزیر ءِ ھاسیں کمکار برائے اھوالکاری ءُ شنگ کاری عاصم سلیم باجوہ، ھاسیں کمکار ڈاکٹر شہباز گل، چئیرمین این ڈی ایم اے لیفٹیننٹ جنرل محمد افضل ءُ کلانہ ایں اپسرگ اے موہ ءِ سر ءَ ساڑی اتنت۔ وھدیکہ سر وزیر پنجاپ عثمان بزدار، سر وزیر سندھ مراد علی شاہ، خیبر پختونخوا ءِ سروزیر محمود خان چیف سیکرٹری بلوچستان ءَ ویڈیو لنک ءِ وسیلگ ءَ دیون ءَ بھر زوری کت۔ مزن وزیر عمران خان ءَ را گوشگ بوت کہ لوکسٹ کنٹرول ءِ واستہ نیشنل ایکشن پلان ءِ اولی بھر سرجمی ءَ کنگ بوتگ۔ پاکستان آرمی ءِ انجینئر انچیف ءُ این ایل سی سی ءِ نیشنل کوآرڈینیٹر لیفٹیننٹ جنرل معظم اعجاز ءَ ملک ءِ اندر ءَ مدگ ءِ گر ءُ دار کنگ ءِ واستہ کتگیں گامگیج آنی بابت ءَ مزن وزیر ءَ را سرجمیں بریفنگ دات۔ مزن وزیر عمران خان ءَ را راجی ، صوبائی ءُ ضلع آنی تک ءَ مانیٹرنگ ، سروے اینڈ کنٹرول، ادارگ آنی وت مہ وتی کورآرڈینیشن، آسراتی آنی گیشینگ ءُ موبلائز کنگ ءُ سرپدی گامگیج آنی بابت ءَ سرجمیں بریفنگ دیگ بوت۔ مزن وزیر عمران خان ءَ مدگ ءِ گر ءُ دار ءِ واستہ نیشنل ایکشن پلان ءِ دومی بھر ءِ کار رھبند آنی منظوری دات۔ اے پیسلہ ھم کنگ بوت کہ آماچیں دھکان آناں اے پیکیج ءِ وسیلگ ءَ زرّ ھم پجاری کنگ بیت۔ مزن وزیر عمران خان ءَ مدگ ءِ ارش ءِ گر ءُ دار کنگ ءُ ھندی تک ءَ تیار کتگیں سامان آنی وسیلگ ءَ بنجاھی ءُ صوبائی حکومت آں ھوار پاکستان آرمی ءِ نیمگ ءَ وھد ءُ موہ ءِ سر ءَ جوانیں کوشست آناں ساڑاتت۔ مزن وزیر ءَ گوشت کہ کوویڈ-19 ءِ گوما مدگ ءِ ارش پاکستان ءِ واستہ ٹوھیں جیڈھ ات۔ آئی ءَ گوشت کہ اے ملک ءِ وردن ءُ وراک ءِ رکھینگ ءِ جیڈھ ات، حکومت اے جیڈھ ءَ را گیواری ءِ واستہ ھمک رنگیں گامگیج ءُ کوشست کنت انت۔ مزن وزیر ءَ گوشت کہ مدگ ءِ ارش ءَ چہ بچگ ءِ واستہ بنجاھی، صوبائی حکومت ءُ ادارگ آنی گوما مھکمیں راجی کوشست کنگ ءِ ضلورت انت تانکہ کشار آناں آماچ بوھگ ءَ پیسر رکھینگ بہ بیت۔