APP54-14 ISLAMABAD: February 14 - Special Assistant to the Prime Minister on Information and Broadcasting, Dr. Firdous Ashiq Awan talking to media. APP

ترکی نا صدر جیرت و نرزوری اتون کشمیری الس نا حق اکن توار بڑز کرے

اسلام آباد ۔ 14 فروری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ ترک صدر پارلیمنٹ نا اسیجا دیوان آن تران اٹی جیرت و نرزوری اتون کشمیری الس نا حق اکن توار بڑز کرے، پاکستان و ترک الس اسٹ ءُ، ہڑتوم آ ملک آک زرگزرانی اقتصادی و واپاری بشخ آتے ٹی ترندی اٹ اسہ ایلو نا خڑک مننگ ءُ ، ترک ایلم ملک پاکستان ءِ ٹیکنالوجی نا فراوانی آن اقوام عالم نا نقشہ غا سوگو کننگ نا خواہندار ءِ ۔ فردوس عاشق اعوان جمعہ نادے آ پارلیمنٹ ہاءوس نا پیشن میڈیا تون گپ و تران کرسا داخیال آتا درشانی ءِ کرے ۔ خصوصی کمکار حوالکاری و شین کاری فردوس عاشق اعوان پارے کہ پاکستان و ترک قوم و سرکڑدہ اسٹ ءُ ۔ ترکی مسلم اقوام عالم ءِ اسیجا ایجنڈا تون مون آ دننگ خواہک ۔ پاکستان و مسلم دنیا نا ویل آتے اسہ اسیجا حکمت عملی اٹ ایسر کننگ کن ترک انا کوشست آک ستاکڑزرہ ۔ اوپارے کہ ترک الس و سرکڑدہ نا منت وار اُن کہ اوفک کشمیری الس تون بھارتی ظلم و جور و استبداد آ وزیراعظم عمران خان نا دوٹوک موقف نا تائید کریر و توار بڑزکریر ۔ فردوس عاشق اعوان پارے کہ پاکستان نا 22 کروڑ الس نا کنڈآن نن ترک صدر رجب طیب اردوان و ہموجاگہ نا الس نا خصوصی وڑاٹ منت وار اُن کہ اوفک کشمیر اٹی بھارت ہندتواظلم وجور آ پاکستانی موقف ءِ جہانی کہول آ بڑز کریر ۔ اوپارے کہ ترک صدر تینا تران اٹی وزیراعظم عمران خان نا توار اٹی توار ملفینے و تینا جوزہ غاتا درشانی ءِ کرسا پاکستانی الس نا اومیت و است خواہی تیا پورو سلیسونے ۔ طیب اردوان تینا تران اٹی پاکستان و ترک الس ءِ اسہ ایلو تون سوگو رشتہ اٹ گنڈنگ نا کوشت کرینے ۔ ہڑتوم آ ملک آتا الس کیہی صدی تیان است آتا رشتہ اٹ تزویراتی شریداری نا دروشم اس ہلکونو ۔ ترک صدر نا ساڑی آ دورہ ہڑتوم آ کنڈآتا تعلقداری، واپار، زرگزران و تکنیکی گام گیج آتے سوگوی ایتک و ہڑتوم آ ملک آتا اسیجا ڈٹ آک اسہ ایلو نا حقی کلیدی واپاری شریداری اٹ بدلینگرہ ۔ اوپارے کہ وزیراعظم عمران خان پاکستان ءِ ڈیجیٹلائز کننگ کن ہرا تصور آتے اختیار کرینے ترک صدر دا بابت آن فنی و تکنیکی مہارت آتا اواری نا ہیت کرینے ۔ اوپارے کہ ترک خاتون اول دنیانا زالبول آتے کن اسلامی راج انا اعتبار اٹ اسہ رول ماڈل اسے و پاکستان نا زالبول آتا جوزہ غاتا عکاسی ءِ کرینے ۔ اوفتا کوشست آتیان زالبول آتا رجی و روشنا قدر آن درخشاں دروشم درستی راستی مننگ ءِ ۔