اسلام آباد ۔ 11ستمبر (اے پی پی) چیئرمین سینیٹ محمد صادق سنجرانی پارینے کہ بانی پاکستان نا خذمت آتے مدام یات تخنگک، قائد اعظم محمد علی جناح نا تعلیمات و اونا فرمودات آتا اہمیت ساڑی آ دور انا ویل آتے مون آ تخسا پین اہمیت اختیار کرینو ، بابائے قوم انا دوراندیشی و سیاسی بصیرت قوم انا تقدیر ءِ بدلیفنگ کن سیوت، ایمان و نظم و ضبط کون آ راہشون اصول وضع کریسس تانکہ غٹ ویل آتا اواری اٹ مقابلہ ءِ کننگ مرے ۔ داخیال آتا درشانی ءِ و بابائے قوم قائد اعظم محمد علی جناح نا 71می کزیہ دے انا وخت آ تینا خصوصی کلہو اٹی کرے ۔ اوپارے کہ ننا ویل آتا بھلا سوب داہم ارے کہ نن او تعلیمات آتے گیرام کرینن ہرافتا پیدواری ءِ بابائے قوم کریسس ۔ اینو ننے ہرامشکل آک مون تروک ءُ ، اوفتا مون ءِ توننگ نا اسٹ انگا کسر کانود و آئین آ عملدرآمد ءِ ۔ اوپارے کہ ننے ہروڑنا اختلاف آتے اسہ پلو تخسا اسہ پرامن، شون پسندانہ و جمہوری سوچ ءِ مون آ دننگ کن اواری اٹ کاریم کروئی مریک تانکہ پاکستان ءِ شونداری و شونہالی نا کسر آ روان کننگ مرے ۔ اودعا کرے کہ اللہ تعالیٰ ننے غٹ ءِ قائد اعظم نا نقش قدم آ چلیفسا وطن عزیز نا جوڑ کننگ و شونداری کن کاریم کننگ نا توفیق عطاء فرماءفے ۔