جنیوا ۔ 11 ستمبر (اے پی پی) وزیر خارجہ مخدوم شاہ محمود قریشی جنیوا ٹی جاری انسانی حق کونسل نا دیوان نا وخت آ او آئی سی پڑک نا سفیر آتون تدوک آ دے اوڑدہی کرے ۔ اوڑدہی ٹی مقبوضہ جموں و کشمیر نا اسہ کنڈی وڑاٹ کروک آ بھارتی گام گیج و اونا مضمرآتیا گپ و تران کننگا ۔ داوخت آ وزیر خارجہ پارے کہ بھارت نا کنڈآن 5 اگست آ مقبوضہ جموں و کشمیر اٹی کروک آ اسہ کنڈی، غیر آئینی گام گیج جہانی کانود و اقوام متحدہ نا قرارداد آتا صریحاََ منافی ءِ ، بھارت ، دا اسہ کنڈی گام گیج آتا آڑاٹ مقبوضہ جموں و کشمیر اٹی آبادی تناسب ءِ بدل کرسا مسلم اکثریت ءِ اقلیت اٹ بدلیفنگ خواہک ۔ وزیر خارجہ مقبوضہ جموں و کشمیر اٹی جاری انسانی حق انا خلاف ورزی تا بابت اوآئی سی نا بیان نا ستاءِ کرسا پارے کہ او آئی سی پیدوار و واشگاف لوز آتے ٹی مقبوضہ جموں و کشمیر اٹی انسانی حق انا خلاف ورزی تا جاست وپاست ءِ کرفنگ و کشمیر نا ویل ءِ اقوام متحدہ سیکورٹی کونسل نا قرارداد آتے مون آ تخسا ایسر کرفنگ نا خواست کرینے ۔ اوپارے کہ اقوام متحدہ نا ہیومن راءٹس ہائی کمشنر آفس ، تینا جون 2018و جولائی 2019ء آ شینک مروک آ رپورٹ آتے ٹی مقبوضہ جموں و کشمیر اٹی جاری بھارتی بیدادی نا پردہ ءِ پاش کرینے ۔ داوخت آ او آئی سی پڑک جنیوا نا گیشتر سفیر آک مقبوضہ جموں و کشمیر نا حالیت آتیا گڑتی نا درشانی ءِ کرسا او آئی سی نا عزم ءِ دہراءفیر و پاکستان نا موقف نا تائید اٹی مقبوضہ جموں و کشمیر اٹی جاری انسانی حق انا خلاف ورزی تا مذمت ءِ کریر ۔ وزیر خارجہ مخدوم شاہ محمود قریشی او آئی سی نا پلیٹ فارم آ کروک آ فیصلہ غاتے گچین وڑاٹ انسانی حق کونسل اسکان سرکننگ آ او آئی سی جنیوا پڑک نا کڑد انا ستاءِ کرے ۔ یات سلے کہ پاکستان او آئی سی جنیوا پڑک نا کوآرڈنیٹر ءِ ۔