جنیوا ۔ 11ستمبر (اے پی پی) وزیر خارجہ شاہ محمود قریشی مقبوضہ جموں و کشمیر اٹی انسانی المیہ نا حالیت آتیا گڑتی نا درشانی ءِ کرسا جہانی ادارہ جا ن جوڑی آن لکھ آ کودک کشمیری تا زند ءِ بچفنگ کن دمدستی گام گیج آتا خواست کرینے ۔ اوداہیت ءِ جنیوا ٹی جاری انسانی حق کونسل نا دیوان نا وخت آ جہانی ادارہ جان جوڑی نا ڈائریکٹر جنرل ڈاکٹر ٹیڈروس تون اوڑدہی ٹی پارے ۔ اوڑدہی ٹی مقبوضہ جموں و کشمیر اٹی پدریسہ کرفیو نا سوب انسانی جان تے مون تروک گڑتی تا بابت گپ و تران کننگا ۔ وزیر خارجہ پارے کہ بھارت مقبوضہ جموں و کشمیر اٹی پنچ اگست آن پدریسہ کرفیو نافذ کرینے، حالیت آک داخہ در تشویشناک ءُ کہ خور و دوائی اسکان ملپننگ ءِ ۔ اوپارے کہ طبی عملہ ءِ پڈپُر نیاڑی، چناو بزرگ آتے طبی آسراتی فراوان کننگ اٹ بھاز دشواری تا مون تروک ءِ ، مقبوضہ جموں و کشمیر نا تشویشناک حالیت آک اسہ پوسکن ءُ انسانی المیہ سے نا پیش بننگ نا پیدواری ءِ کننگ ءُ و جہانی ادارہ جان جوڑی ءِ لکھ آ کودک کشمیری تا زند ءِ بچفنگ کن دمدستی گام گیج آتا گرج ءِ ۔ یات سلے کہ وزیر خارجہ مخدوم شاہ محمود قریشی اقوام متحدہ ہیومن راءٹس کونسل نا 42می دیوان اٹی بشخ ہلنگ کن 9 ستمبر آن 11 ستمبر اسکان جنیوا نا دورہ ءِ کننگ ءِ ۔