اسلام آباد ۔ 11 ستمبر (اے پی پی) وزیراعظم عمران خان پارینے کہ پاکستان تحریک انصاف نا کنڈآن ہندی وڑاٹ گچین مروک آ نمائندہ غاتے واکدار کننگ و ہندی کہول آ ویل آتا ایسری کن درستی راستی کرفوک آ ہندی حکومت آتا پوسکن آ نظام حقی وڑاٹ انقلاب اس اتیک، ہندی حکومت آک قومی سرکڑدہ ہی نا نرسری ثابت مریرہ ۔ اوداہیت ءِ چارشنبے نادے آ ہندی حکومت آتا پوسکن آ نظام نا بابت بڑزکو کہول انا دیوان اسے نا کماشی ءِ کرسا پارے ۔ دیوان اٹی وزیر دفاع پرویز خٹک، گورنر خیبر پختونخواشاہ فرمان ، وزیراعلیٰ خیبر پختونخوا محمود خان ، قومی اسمبلی نا باسک اسد عمر، خیر پختونخوا نا وزیر خزانہ تیمورسلیم جھگڑا، صوبائی وزیر لوکل گورنمنٹ شہرام خان ترکئی و سینئر آفیسر آک ساڑی ئسر ۔ دیوان اٹی پی ٹی آئی حکومت نا کنڈآن درستی راستی کرفوک آ ہندی حکومت آتا پوسکن آ نظام آ عملدرآمد نا بابت گپ و تران مس ۔ دیوان اٹی ساڑی مروک آتے صوبہ خیبر پختونخوا و پنجاب اٹی درستی راستی کرفوک آ ہندی حکومت آتا پوسکن آ نظام نا خدوخال آ سرجم حوال تننگا ۔ دیوان آن تران کرسا وزیراعظم عمران خان پارے کہ پی ٹی آئی نا کنڈآن درستی راستی کرفوک آ ہندی حکومت آتا پوسکن آ نظام حقی وڑاٹ انقلاب اس اتیک ۔ اوپارے کہ پوسکن آ نظام نا رداٹ ہندی وڑاٹ گچین مروک آ نمائندہ غاتے واکدار کننگانے تانکہ اوفتے ہندی کہول انا ویل آتے ایسر کننگ و تینا علاقہ غاتا جوڑ کننگ و شونداری ٹی ہچ وڑنا مشکل اس پیش بف ۔ وزیراعظم پارے کہ ہندی حکومت آک قومی سرکڑدہ ہی نا نرسری ثابت مریرہ ۔ مستین نا مقابلہ ٹی پوسکن آ نظام نا رداٹ شونداری فنڈ آتا ہندی کہول آ گدریفنگ آن نئے بیرہ الس نا بنداوی ویل آتا ایسر مننگ کیک بلکن دا فنڈ آتا امتیازی بشخنگ و جندی پسند ناپسند نا بنداو آ مخصوص علاقہ غاتے ٹی کاریم اٹ اتنگ نا روش نا ہم جوان وڑاٹ توننگ ممکن مریک ۔ اوپارے کہ تحصیل و میونسپل کہول آ براہ راست گچین کاری آن ہراڑے الس ءِ اہل و قابل نمائندہ گچین کننگ نا وارخواہی دوبریک ہموڑے سیاسی جماعت آک ہم سوگو مریرہ ۔ وزیراعظم پارے کہ ہنداوڑ واکدار گچین مروک نمائندہ غاک بے اڑاند تینا پبی توانائی تے تینا علاقہ غاتا جوڑ کننگ و شونداری و الس نا ویل آتے ایسر کننگ اٹ صرف کننگ کیرہ ۔