اسلام آباد۔ 12جون (اے پی پی) بنجائی وزیر انسانی حق ڈاکٹر شیریں مزاری پارینے کہ ساڑی حکومت چناتتون جبری مشقت نا چٹفنگ و اوفتا گچین آخبت کن سنبرینگوک ءِ، الس اٹی چناتتون جبری مشقت نا چٹفنگ نا بابت وزارت انسانی حق آگاہی مہم اسے نا بناءِ کننگ ءِ۔ چارشنبے نادے آ چناتتون جبری مشقت نا چٹفنگ نا جہانی دے انا وخت آ تینا کلہو اٹی بنجائی وزیر پارے کہ وزارت انسانی حق پاکستانی چناتا روشنا آخبت کن پبی گام گیج کننگ ءِ وخت اس کہ آئین پاکستان و اسلامی تعلیمات آتے ٹی چناتا حق انا بابت گچین راہشونی تننگانے۔ بنجائی وزیر انسانی حق پارے کہ پاکستان 1990 ء ٹی چناتا بابت سروک دیوان نا 6محرکین ملک آتے ٹی اوار ئس، ہراٹی چناتا حق انا بابت کنونشن ءِ پک کننگا و داڑا دستخط کننگا۔ پاکستان 1982 ء ٹی چناتتون بدترین مشقت نا توننگ کن آئی ایل او نا کنونشن ءِ ہم پک کرے و متنازع علاقہ غاتے ٹی چناتا کاریم اٹ اتنگ نا بابت سی آر سی نا آپشنل پروٹوکول آ ہم دستخط کرینے۔