اسلام آباد۔ وزیراعظم نا خصوصی کمکار امور نوجواناں عثمان ڈار پارینے کہ اپوزیشن جماعت آتون ہچ ءُ پیدوار ءُ ایجنڈا اس اف او بیرہ پاکستان تحریک انصاف نا حکومت ءِ چٹفنگ خوارہ۔ چارشنبے نادے آ اسہ نجی ٹی وی چینل اسے تون گپ و تران کرسا عثمان ڈار پارے کہ حزب اختلاف نا جماعت آتا سرکڑدہ جندی ویل آتیا کوک و پاڑو کننگ ءِ و او تینے احتساب آن بچفنگ خواہک۔ اوپارے کہ حکومت قومی دولت ءِ پلوک آتے کانود نا مون آ پیش کننگ کن ہروڑنا گام گیج کننگ ءِ، پاکستان پیپلزپارٹی و مسلم لیگ (ن) نا سرکڑدہ غاتا برخلاف کیس آک گدرینگوک آ حکومت آتا دوراٹی رجسٹرڈ کننگار۔ عثمان ڈار پارے کہ ملک انا غٹ ادارہ غاک آجوئی اٹ کاریم کننگ ءُ و او ہر پاکستانی نا برخلاف جاست وپاست کننگ کیرہ۔ اوپارے کہ حکومت ملک آن وڈی خوری نا چٹفنگ کن سنبرینگوک ءِ و دا بابت ہچ ءُ سمجھوتہ اس کننگپک و اسہ ہم وڈی خور بندغ اسے رعایت ملیپک۔ عثمان ڈار پارے کہ وزیراعظم عمران خان نا حکومت گچین کاری تیٹی الس تون وعدہ کریسس کہ پی ٹی آئی وڈی خور عنصر آتے جیل آتے اٹ بند کیک۔ اوپارے کہ وڈی خور عنصر آتا کنڈآن ہلوک آ بھلا وام تا بھاریم غریب الس آٹے، وزیراعظم عمران خان جہانی کہول آ ملک انا عزت و شرف اٹ ودکی کن سخت خواری کننگ ءِ، ہمو وخت مراف ہراتم تنکی و ویل آتا مون ءِ توننگک۔ اسہ سوج اسے نا ورندی ٹی اوپارے کہ قومی احتساب بیورو (نیب) اسہ وتواجہ ءُ ادارہ اسے و او حکومت نا زیر اثر اٹ اف، اپوزیشن نا برخلاف دھرناتننگ نا است خواہ ءِ تو حکومت اوفتے کنٹینر، بریانی و دیر فراوان کیک۔