لاہور ہائیکورٹ، کٹیا غان زیات میرات کیس اٹی عبدالعلیم خان نا درخواست ضمانت منظور

10 لکھ نا ضمانتی مچلکہ جمع کرفنگ نا پارت
لاہور۔ 15مئی (اے پی پی) لاہور ہائیکورٹ کٹیا غان زیات میرات کیس اٹی عبدالعلیم خان نا درخواست ضمانت ءِ منظور کرے، عدالت عبدالعلیم خان ءِ 10 لکھ نا ضمانتی مچلکہ جمع کرفنگ نا پارت کرے، ہائی کورٹ نا جسٹ علی باقر نجفی نا سرکڑدہ ہی ٹی اِرا باسکی بنچ کیس اناسماعت ءِ کرے۔ نیب انا کنڈآن عبدالعلیم خان نا مبینہ مشکوک بینک ٹرازیکشنز و زرکاری نا سرجم آتے عدالت اٹ پیش کننگا۔ نیب انا جاست وپاستی آفیسر پارے کہ عبدالعلیم خان نا کٹیا کننگ نا ذریعہ و خڑچ آتے ٹی توازن اف، کیہی ملین نا میرات آتے پاش کننگتو، چندی ملک آتیان آفشور کمپنی تا بابت ریکارڈ ءِ بٹنگ انگ اُن۔ ملوک آ ریفرنس فائل کننگک۔ عبدالعلیم خان نا وکیل پارے کہ اسٹ اسہ ہم غیر معینہ مد اکن جیل اٹ تخنگ مفک۔ کٹیا غان زیات نا دوبہ غلط ءِ، عبدالعلیم خان ناکٹیا کننگ نا ذریعہ اگہ اونا میرات آتیان زیات ءِ تو نیب کیس ءِ چلیفے نن مون ایتنہ ولے عدالت آن خواست ءِ کہ عبدالعلیم خان ءِ ضمانت آ یلہ کے۔ نیب پراسیکوٹر پارے کہ عبدالعلیم خان 2002 ء ٹی الیکشن کرے ہمووخت آ اونا میرات آک 5.4 ملین ئسر، وزیر مننگ آن پد اونا میرات آتے ٹی ودکی مس۔ عبدالعلیم خان ءِ اونا لمہ و باہ نا کنڈآن پیشن نا ملک آن ہرا پیسہ غاک ملار داسکان اوفتا شاہدی ءِ تننگتنے و نئے اینو اسکان پاننگانے کہ پیشن نا ملک آن دا پیسہ غاتے دیر گدریفے۔ عدالت وکیل آتا دلیل پورو مننگ آن پد فیصلہ ءِ بنفسا عبدالعلیم خان نا ضمانت ءِ منظور کرے۔ یات سلے کہ عبدالعلیم خان ءِ نیب انا کنڈآن کٹیا غان زیات میرات کیس اٹی 6 فروری آ دزگیر کننگاسس، نیب داسکان عبدالعلیم خان ناریفرنس عدالت اٹ دائر کننگ کتنے وخت اس کہ نیب عبدالعلیم خان نا آفشور کمپنی تا سرجم آتا دوئی کن متحدہ عرب امارات و برطانیہ ءِ چھٹی اس ہم نوشتہ کرینے۔