صدر مملکت ڈاکٹر عارف علوی نا امام کعبہ شیخ عبداللہ عواد الجہنی تون اوڑدہی ٹی گپ و تران

اسلام آباد۔ 15اپریل (اے پی پی) صدر مملکت ڈاکٹر عارف علوی پارینے کہ پاکستان برادر ملک سعودی عرب تون تینا تعلقداری تے بھاز اہمیت ایتک ہرا اسیجا تاریخ، دودوربیدگ ، روایت ، عقیدہ و قدر انا سوگو رشتہ غاتون گنڈوک ءِ۔ اوداہیت ءِ امام کعبہ شیخ عبداللہ عواد الجہنی تون گپ و تران کرسا پارے ہرا دوشنبے نادے آ ایوان صدر اٹی اوڑتون اوڑدہی کرے۔ صدر مملکت سعودی ولی عہد شہزادہ محمد بن سلمان نا ساڑی سرسہب دورہ پاکستان نا ذکر ءِ کرسا پارے کہ سعودی ولی عہد پاکستانی برادری نا کمک کن تینا فراخدلانہ پیش کش آن پاکستان نا الس نا است ءِ کٹانے۔ اوہر سال حج و عمرہ کروک آ پاکستانی حاجی تا کمک آ سعودی عرب نا خذمت آتا ستاءِ کرے۔ اوپاکستانی تیکن حج کوٹہ ءِ 2لکھ اسکان ودفنگ و پاکستان ءِ ’’روڈ ٹو مکہ‘‘ ڈٹ اٹی اوار کننگ نا سعودی فیصلہ غاتا ستاءِ کرے۔ اواومیت ظاہر کرے کہ دا ڈٹ ءِ حج 2020ء ٹی غٹ پاکستانی بالی پٹ آتسکان ودفنگک۔ صدر پارے کہ سعودی عرب اٹی بھاز بھلو کچ اسے ٹی پاکستانی برادری ہڑتوم آ برادر ملک آتا نیام اٹ سوگو السی رشتہ غاتا غماز ءِ۔ اوپارے کہ پاکستانیک سعودی عرب ءِ تینا ارٹ میکو اُرا تکرہ و سلطنت نا شونداری و شونہالی کن است جمی اٹ کاریم کیرہ۔ اوسعودی فرمانرواں سلمان بن عبدالعزیز و ولی عہد شہزادہ محمد بن سلمان و سعودی عرب نا برادر الس کن تینا نیک است خواہی تا ہم درشانی ءِ کرے۔ امام کعبہ پارے کہ پاکستان و سعودی عرب نا تعلقداریک بیرہ سفارتی آخا بلکن دا عقیدہ غا مبنی ءُ۔ اوپارے کہ پاکستان سعودی عرب نا طاقت ءِ و ننا خلقت نا است آک اسہ ایلو تون دھڑکرہ۔ اوداہیت آ زور شاغا کہ ہڑتوم آ ملک آتا نیام اٹ چندی بشخ آتے ٹی ڈل آتا زیات آن زیات بایدے کار و بریر۔