بنجائی وزیر اطلاعات و نشریات چوہدری فواد حسین نا ’’ہواوے پاکستان موبائل سمٹ‘‘ نا بشخ ہلوک آتیان تران

اسلام آباد۔ 15اپریل (اے پی پی) بنجائی وزیر اطلاعات ونشریات چوہدری فواد حسین پارینے کہ پاکستان اٹی ٹیکنالوجی ءِ مون آدننگ اٹ ہواوے نا کڑد اہم ءِ، یورپ و امریکہ نا کمپنیک پاکستان اٹی زرکاری ٹی است خواہی ہلنگ ءُ، بروک آ دور ٹیکنالوجی نا ءِ، و پاکستان ءِ دنیا نا رفتار تون مون آ ہِننگ کن پوسکن آ ٹیکنالوجی تون ہم گرنچ مروئی تمک۔ ننے ٹیکنالوجی کمپنی تتون کمک کروئی ءِ و تینا ورناتے سائنسی و پوسکن آ ٹیکنالوجی آ مبنی علم انا دوئی کننگ اٹ آسراتی تروئی ءِ، ٹیکنالوجی کمپنیک ریسرچ و ڈویلپمنٹ اٹی نوکری تا بارواٹ ہم بایدے سجفر ۔ داخیال آتا درشانی ءِ او دوشنبے نادے آ داڑے ’’ہواوے پاکستان موبائل سمٹ‘‘ نا بشخ ہلوک آتیان تران کرسا کرے۔ بنجائی وزیر پارے کہ سرسید احمد خان مسلمان تا چکار ءِ پوسکن آ علم انا کنڈاکرفے، ننے پوسکن آ دور انا چیلنج آتون مون تننگ کن سرسید احمد خان نا فکر آ عمل کروئی مریک۔ اوپارے کہ پوسکن آ خواست آتیان ہم گرنچ متون تو نن پدی سلنہ و شون ہلنگ کپنہ۔ وزیر اطلاعات پارے کہ پاکستان و چین مدام عظیمءُ سنگت مسنو ولے صدر شی جن پنگ انا سرکڑدہ ہی ٹی دا تعلقداری تا غٹ سوب آتے ٹی اسہ بھلو بدلی اس بسنے۔ اواومیت ظاہرکرے کہ ہڑتوم آ ملک ٹیکنالوجی نا بشخ اٹی بھلو سرسہبی اس دوئی کیرہ۔ بنجائی وزیر اطلاعات ونشریات یات دہانی کرفے کہ 1960 ء نا دہائی ٹی پاکستان ہندی وڑاٹ تیار کروک ٹرانسمیشن و ریڈیو ازباب آتے کاریم اٹ ایسکہ ولے بدبختی اٹ داسہ ہرگڑاءِ درآمد کننگ ءِ۔ اوپارے کہ نن فیصلہ کرینن کہ میڈیا یونیورسٹی اس جوڑ کینہ ہراڑے میڈیا نا بشخ اٹی پوسکن آ ٹیکنالوجی نا رجحان ءِ مون آ تخسا تعلیم تننگک۔ بنجائی وزیر پارے کہ وخت اتون اوار اوار ٹیکنالوجی نا بشخ اٹی شونداری نا عمل ترند مننگ ءِ، ہواوے کون آ پوسکن آ کمپنیک دا بشخ اٹی کاریم کننگ ءُ۔ داوخت آ بنجائی وزیر انفارمیشن ٹیکنالوجی خالد مقبول صدیقی تران کرسا پارے کہ نن ٹیکنالوجی نا دوراٹی رہینگ انگ اُن ہراڑے ٹیکنالوجی نا بشخ اٹی ہردے بدلی بننگ ءِ۔ اوپارے کہ ٹیکنالوجی اقتصادی نمو ٹی اہمیت تخک نن ڈیجیٹل چاہنداری تیٹی زرکاری کننگ اُن، ٹیکنالوجی نا سوب ترند رفتار دنیا ہرگڑاءِ بدل کرینے ہلانے ، وزارت انفارمیشن ٹیکنالوجی ڈیجیٹل پاکستان کن کوشست کننگ ءِ تانکہ جہانی دنیا تون چلینگ انگ کے۔ کانفرنس نا بنائی دود آن چین نا اکنامک وکمرشل قونصلر وانگ ژی ہواو ہواوے مڈل ایسٹ انا نائب صدر سن کائی فینگ ئسک ہم تران کریر و ہواوے نا پاکستان و ایلو ملک آتے ٹی ساڑی و آخبت نا سرجزآتیا بشخ ہلوک آتے حوال تسر۔