پاکستان و بھارت کرتار پور راہداری ءِ آپریشنل کننگ کن کاریم نا رفتار ءِ ودفنگ آ امنا

اسلام آباد۔ 14مارچ(اے پی پی) پاکستان و بھارت کرتارپورراہداری ءِ آپریشنل کننگ کن کاریم نا رفتار ءِ ودفنگ آ امنا کرینو۔ داامنائی پنچ شنبے نادے آ پاکستان و بھارت اٹی رہینگوک سکھ برادری ءِ آسراتی تننگ نا غرض اٹ کرتارپور راہداری ءِ ملنگ نا بابت تکنیکی معاملہ غاتے پک کننگ کن اٹاری کمپلیکس بھارت اٹی اڈ ہلوک آ پاک۔بھارت مذاکرات اٹی مس۔ پاکستان نا 18باسکی ڈل انا کماشی ءِ ڈائریکٹر جنرل سویلی ایشیا ء و سارک ڈاکٹر محمد فیصل وخت اس کہ بھارتی ڈل انا کماشی ءِ وزارت داخلہ نا جوائنٹ سیکرٹری کریرہ۔ دیوان آن پد میڈیا ءِ حوال ترسا ڈاکٹر فیصل پاک۔بھارت ہیت وگپ ءِ مثبت گوندا و پارے کہ کرتارپور ویزہ فری راہداری اسے۔ ہیت وگپ مثبت چاگڑد اٹی مس، نن مون آ ہِننگ اُن۔ اوپارے کہ راہداری نا بابت پاک۔بھارت تکنیکی چاہندار آتا ارٹ میکو دیوان 2اپریل آ واہگہ ٹی مریک۔ دیوان اٹی کرتارپور راہداری نا بابت تکنیکی معاملہ غاتے پک کننگک۔ اسہ سوج اسے نا ورندی ءِ ترسا اوپارے کہ مذاکرات خوشگوار چاگڑداٹی مس وخت اس کہ اسیجا اعلامیہ جاری مننگ بھلو سرسہبی اسے۔ ڈاکٹر فیصل پارے کہ اٹاری ٹی ہڑتوم آ ملک آتا نیام اٹ تکنیکی چاہندار آتا دیوان اس ہم مس۔ اسہ سوج اسے نا ورندی ءِ ترسا اوپارے کہ نن غٹ ءِ اوار دینہ کانہ۔ کرتار پور راہداری نا بابت بھارت نا کنڈآن ہم بھلو کاریم اس مسنے و نن مون آہِننگ اُن۔ اسیجا اعلامیہ نا رداٹ دیوان اٹی کرتارپور راہداریءِ آپریشنل کننگ کن تعمیری گپ و تران مس۔ اعلامیہ نا رداٹ 19 مارچ آ کرتار پور زیروپوائنٹ اٹی ہڑتوم آملک آتا تکنیکی چاہندار آتا دیوان اس ہم مریک۔ بھارت روانگی آن مست ترجمان تینا ریمارکس اٹی پارے کہ نن دا گام ءِ تعمیری رابطہ غاتا جوزہ و علاقائی امن و سلامتی نا غرض اٹ بے چیٹی تے کم کننگ کن پاکستان نا مخلصانہ کوشست آتا رداٹ ہرفینن۔ ترجمان اومیت ظاہر کرے کہ وزیراعظم عمران خان نا دا گام آن نئے بیرہ سکھ خاص کر بھارتی سکھ برادری ءِ آسراتی ملک بلکن چک و تاڑ نا ساڑی حالیت آتے ٹی تنازعہ آن کمکاری نا کنڈا سہی سمت اٹی اہم گام اس مریک۔