وزیر خارجہ مخدوم شاہ محمود قریشی تون وزیراعظم آزاد کشمیر راجہ فاروق حیدر نا کماشی ٹی پارلیمانی راہشون تا 14باسکی ڈل انا اوڑدہی

اسلام آباد۔ 14مارچ(اے پی پی) وزیر خارجہ مخدوم شاہ محمود قریشی تون پنچ شنبے نادے آ وزارت خارجہ ٹی وزیراعظم آزاد کشمیر راجہ فاروق حیدر نا کماشی ٹی آزاد جموں و کشمیر نا پارلیمانی راہشون تا 14باسکی ڈل اوڑدہی کرے۔ گپ و تران اٹی مقبوضہ جموں وکشمیر اٹی ساڑی ابتر حالیت آتا بابت گپ و تران کننگا۔ پارلیمانی راہشونک پاک۔ بھارت لین آف کنٹرول و ورکنگ باؤنڈری آ ہندوستان نا کنڈآن وار وار آ بے خار سم کاری آ گڑتی و است ہسونی نا درشانی ءِ کریر۔ وزیر خارجہ مخدوم شاہ محمود قریشی داوخت آ ہندوستان نا جارحانہ رویہ نا مذمت ءِ کرسا پارے کہ ڈیہہ ٹی امن و سوگوی کن کشمیر نا ویل انا ایسری اقوام متحدہ نا قراردادآتے مون آ تخسا زوت کننگ بے کچ المی ءِ۔ جموں و کشمیر نا پارلیمانی راہشونک کودک کشمیری تیا کروک آ بیدادی و کشمیر نا ویل ءِ جہانی کہول آ تالان کننگ آ وزیر خارجہ مخدوم شاہ محمود قریشی نا منت واری ءِ ہرفیر۔ وزیر خارجہ پارے کہ پلوامہ واقعہ غان پد مقبوضہ جموں و کشمیر اٹی جاری بھارتی بیدادی نا کچ اٹی ودکی قابل مذمت ءِ۔